Fermandarîya Pêroyî ya Yewîyê Pawitişî ya Cinîyan (YPJ) bîlançoya şerî ya serra 2018î ya Vakur û Rojakewtena Sûriye eşkera kerde.

Eşkerayîya ke tede ame vatene ke ‘‘Ma sey Yewîyê Pawitişî yê Cinîyî (YPJ) serra 2018î de wezîfeyê xo yê pawitişê cinîyan û şarê xo bica ardê‘‘ ca dîya nînan:

‘‘Hêzanê ma Xoverdayîşê Dewrî yê Efrînî yo ke dewam keno, ê de bi îradeyê xurtî hemverê hêrişê îşxalê dewleta Tirkî de xover da. Şerwananê ma bi nê xoverdayîşî bawerîya ma ya serkewtişî û qerardarîya ma ramojnayî.

Reyna şerwananê ma Hamleya Firtineyê Cizîre de zî aktîf ca girewt û sere de DAÎŞ hemverê grûbanê terorî û îşxalkaran de şer kerd.

Bîlançoya şer û xoverdayîşî ya serra 2018î wina ya:

*Efrîn de 58 rojan de 900 pêkewtişî vejîyayî.

* Hêzanê Îşxalkaran hezar 42 hêrişê hewayîyî kerdî.

*Şerî de 2 hezar 422 leşker û çeteyê Tirkî ameyî kiştene.

*Merhaleya dîyine ya Xoverdayîşê Dewrî de 147 çalakîyî ameyî viraştene.

*Nê çalakîyan de 350 çete û leşkerê Tirkî ameyî kiştene.

*Şerwananê YPJyî Hemleya Firtineyê Cizîre de rayberîye kerde.

*Merhaleyanê cîya-cîyayan ê hemleye de 4 hezar 214 çeteyê DAÎŞî ameyî kiştene.

*Hemle de xeylî qezayî û bi seyan dewî îşxalê DAÎŞî ra ameyî azadkerdene.

*Bi des hezaran sivîlî çeteyan ra ameyî xelisnayene.

*2018 de 149 şerwanê YPJyî yê ke şerê rûmetî dayêne, şehîd kewtî.‘‘

Fermandarîya YPJyî da zanayene ke serra 2018î de bi seyan cinîyî tewrê sefanê YPJyî bîyê.