Çalakîyê seba azadîya Rayberê Şarê Kurdî Abdullah Ocalanî dewam kenê. Vizêr reyna Cenevre, Koln û Bielefeld de seba azadîya Rayberê Şarê Kurdî Abdullah Ocalanî çalakîyî ameyî kerdene.

Şaristanê Cenevre yê Swîsre de aktîvîstanê TCŞ û TÊKO-JIN pê çalakîya rayraşîyayîşêkî tecrîdkerdişê Rayberê Şarê Kurdî protestokerd. Çalakîye de sloagnê sey 'Ciwanî fedayîyê Rayber Apoyî yê', 'Biciwîyo Serek Apo', 'Ocalanî rê Azadîye' ameyî vatene. Ciwanan eşkerayîya xo de ard ziwan ke seba azadîya Ocalanî ciwanî do mesuldarîya xo bîyarê ca.

Şaristanê Bielefeldî yê Almanya de çalakîya xeyme roja diyîne de dewam kerde. Roja 2. de kurdîstanijanê Osnabruck û Munsterî çalakîye dewr girewte. Xeyme pê posteranê Ocalanî xemilîyaye. TÊKO-JIN, SMJÊ û CÎKî xeyme zîyaret kerd. Çalakîye de kitabanê Rayberê Şarê Kurdî ra tay pasajî ameyî wendene. Çalakîye de Neteweyanê Yewbîyayeyan rê zî seba azadîya Abdullah Ocalanî mektubî erşawîyayî. 

Çalakîya xeyme ya Kolnî roja diyîne de rayberîya Federasyonê MEDî û YJK-E NRWyî de dewam kerde. Çalakîye de sîyasetmedare Leyla Bîrlîk qisey kerd û da zanayene ke Abdullah Ocalan Zîndanê Îmraliyî de binê tecrîdêkê giranî de yo. Leyla Bîrlîk ard ziwan ke ganî seba aramî û haştîye reyna Abdullah Ocalanî reyde pêvînayîşî bêrê kerdene. 

Temsîlkarê AGÎFî Şafak Denîzî zî pê qiseykerdişê xo paştî da çalakîye. Denîzî pare kerd ke têkoşînê vera tecrîdê Îmraliyî têkoşînê vera emperyalîzmî yo.

Çalakîye de hunermendî Besere Şahîn, Bengî agirî û Rêber Serhat deyîrî vatî.