Panelê  ‘’Tirkîya de Mucadeleyê Demokrasî yê Kurdan’’ yo ke Parlamentoyê Brîtanya de ame viraştene de grevê vêşanîye û rojeyê mergî  yê ke semedê wedartişê tecrîdê serê Rayberê Şarê Kurdî Abdullah Ocalanî ameyî viraştene û ser kewtî ameyî ercnayene.

Panelo  ke xeylî rojnamegerî, aktîvîstî û temsîlkarê sazîyan tewrê ci bîyî  parlamentere Partîya Karkeran Lloyds Ruusel Moyle û Bambos Charalambous, sereko anorkî yê HDP’yî Ertugrul Kurkçu, rojnamegere Zehra Dogane û xoverdayoxanê grevê vêşanîye ra Haci Ozkan Ozdemîr sey qiseykerdoxî tewrê ci bîyî. Avukata Ocalanî Newroz Ûysalî zî bi rayîrê Skype tewrê ci bîyî.

Qiseykerdişan de bale ancîyaye serê serkewtişê grevê vêşanîye û ame vatene ke tecrîd bi xoverdayîşî ame şiktene la hema herçî nêqedîya xoverdayîş dewam keno.

Zehra Dogana ke wextê xoverdayîşê xoîdarekerdişî de Nisêbîn û Cizre de rojnamegerîye  kerdêne hêrişê dewlete yê serê sivîlan ard vîrî û va: ’’Bi sebebo ke şarê Kurdî wazeno bi nasnameyê xo  biciwîyo, xoîdare bikero dewlete bajarê Kurdan rijnayî û polîsan eşkera qij ra pîl şarê Kurdî  qetil kerd la dinya no hêriş nêdî.’’

Ertugrul Kurkçu zî bale ante hêrişê serê hetanê mualîfan û va: ‘’Hemserekê ma zî tede 12 parlamenterê ma  zîndan de yê 20 embazê ma zî diaspora de yê. Rîyê sebebanê sîyasîyan ra 40 hezar kesî zîndanan de yê. Nînan ra 12 hezarî Kurdê mualîf ê. Kapasîteyê zîndanan 220 hezar o la 260 hezar kesî zîndanan de yê. Medya se ra 90 binê kontrole Erdoganî de ya. Rixmê naye HDP’yî hêzê xo ra çîyêk vînî nêkerd. Erdogan do 23’ê Hazîrane de reyna vîn bikero.’’