Bi beşdarbîyayîşê 326 Kurdistanij û dostanê înan, verê awanîya Parlementoyê Ewropa yê bajarê Strasbourgî yê Fransa de grevê vêşanîye amebi destpêkerdene û çalakîye kewte roja xo ya 2’yîne.
Seke yeno zanayene, Leyla Guvene seba ke tecrîdê serê Rayberê Şarê Kurdî Abdullah Ocalanî bêro wedaritene dest bi grevê vêşanîye kerdbi û peyê cû Nasir Yagiz, girewteyê PKK û PAJK’î yê zindananê Tirkîya, reyna Ewropa de zî xeylî merkezan de Kurdî kewtî grevê vêşanîye. Bajarê Fransa Strasbourgî de, verê awanîya PE’yî de, Kurdî û dostê înan, seba ke bale biancê grevanê vêşanîye ser û paştdarîye bidê ci bi girseyîye çalakîya grevê vêşanîye ya bidore-biwexte organîze kerde.
Çalakîye vizêrî dest pêkerde û ewro zî dewam kena. Vizêrî sîyasetmedar û parlamenterê HDP’yî yo verên Faysal Sariyildizî çalakwanî zîyaret kerdî. Sariyildizî çalakîye de qiseykerdişêk kerd û va: ”Ma seba ke anorê xo bipawê tîya de yê. Sere de Leyla Guvene, ganî ma pêro xoverdayoxan rê wayîr bivejîyê.”
Goreyê planî ganî wezîfedarê Konseya Ewropa biameyêne zîyaretê çalakîye, la nêameyî û naye ser çalakwanan reaksîyon da û çalakîyêka bîne viraşte. Çalakîye de ame vatene, senî ke merganê heta ewroyî ra ê mesul ê, naye ra dima zî do bi bêvengîya xo dewletê Ewropa mesuldar bê.
Ciwanan ra çalakîye
Çalakîya verê PE’yî wexto ke dewam kerdêne, hetê Têgêrayîşê Ciwanan ê Şorişgêran û Cinîyê Ciwanî yê Azadan ra zî, verê Katedralê Notredam û Place de Kleberî de çalakîyî ameyî viraştene. Çalakwanî seba ke şewe derbaz bikerê saet 17.00 de derbazê bajarê Lahrî yê Almanya bîyî.
Bi babetê grevê vêşanîye
Tîya de yew panel ame organîzekerdene û sîyasetmedaro Kurd Demîr Çelîk sey qiseykerdox beşdarê panelî bi. Çelîkî bale ante çalakîyanê fedaîyîyan ê Zulkuf Gezen, Zehra Saglame, Ayten Beçete, Medya Çinare û Ûgûr Şakarî ser û wina va: ”Birêz Ocalan tena Rayberê Kurdan nê, ê pêro şaran o. Ocalanî çar parçe Kurdîstan ardo têhet û ewro cîyayîya dîn, ziwan û cinsîye mabên ra darda we. Wayîrê fikrê demokrasîyê ekolojîk û cinsîyetî yo. No mucadele bi saya ey 1978 ra resto ewroyî. Merdim senî rayberê winasîyî rê wayîr nêvejîno ke! Kurdî ke rêxistinbîyayî bê, qet yew hêz nêeşkeno paştîya ci bîyaro erd, la eke wina nêbo, Kurdî do zaf çî bikerê vîndî.”Panel bi pers û cewaban û sloganan qedîya.
