Vîrusê Korona maojna ke Şero Hîreyîn ê Dinya pê hêrişanê bîyolojîkan do dewam bikero. Hetê bînî ra welatê kapîtalîstî yê sey Tirkîya Lîbya û Îdlîb de teng bîyî û prosesê vîrusî sey firsend xebitnenê. Dewleta tirke nê prosesî de hedef kena ke şarê kurdî qetil bikera û Kurdîstan îşxal bikera. Dewleta tirke bi nê hawayî wazena ke emrê xo derg bikera.

Wazenê ke şexsê Mexmûrî de sîstemê Xoserîya Demokratîke çin bikerê

Ambargoyê vera Mexmûrî û provakasyonê Zînî Wertê mojnenê ke dewleta tirke wazena şexsê Mexmûrî de sîstemê Xoserîya Demokratîke çin bikera. Coka her erdê kurdan hedefê ci de yo. Ambargoyê vera Mexmûrî bi sebebê hêrişanê DAÎŞî û zêdîyayîşê hêrişanê hewayî.

Wextê ambargoyî de 2 reyî hêriş ame kerdene

Prosesê ambargoyî de 19ê temmuza 2019î de teyarayanê şerî de Kampa Mexmûrî ser o bombayî varnayî. Bombarduman de 2 sivîlî birîndar bîyî. 15ê nîsane de zî teyarayanê şerî yê artêşa tirke kampe daye bombayan ver û nê bombardumanî de 3 cinîyî ameyî qetilkerdene. Verê cû zî netîceya bombardumanan de tay sivîlî kişîyanî û birîndar bibî.

Têgêrayîşê teyarayanê şerî

Ambargoyî ra nata hema hema her roje teyarayê keşfî û şerî hasmênê Mexmûrî de fetilîyayî. Nêameyêne zanayene ke nê teyarayî aîdê dewleta tirke, Iraq yan zî koalîsyonê mîyanneteweyî yê. Ne Hukmatê Iraqî ne zî Hukmatê Herêma Kurdîstanî vera nê têgêrayîşanê teyarayan vengê xo nêvet. No zî guman û tehlukeyan zêdîneno.

Şarê Mexmûrî rixmê hêrişan zî gamêke aper nêeşte

Şarê Mexmûrî yo ke 26 serran ra nata vera zorî û zehmetîyan sereyê xo nêard war, vera ambargo û ablûqa zî çok nêşi erdî ro. 10 serran ra nata şarê Mexmûrî zehmetîye anceno. Dewleta tirke vatêne qey şarê Mexmûrî do teslim bibo. La şarê Mexmûrî nêverda ke planê tirkan bibo raşt.

Endamê Komîteya Dîplomasî ya Kampa Şehîd Rûstem Cûdîyî ya Mexmûrî mamosta Seîd Çomlekî hêrişê vera Mexmûrî, polîtîkayê dewleta tirke, hêrişê DAÎŞî û tewirê şarî ANFyî rê ercnayî.

Mamosta Çomlekî vat: ''Şarî Hewlêr de xebitîyayêne û debarê xo kerdêne. La şîyayîşê Hewlêrî hetê PDKyî ra qedexe bi. Nêweşê ma estê la reyna zî destûrê şîyayîşî nêdanê. PDKyî hemwelatîyê ke Hewlêrî ra ameyêne, tepiştêne, asteng kerdêne şar şoro Hewlêr. Ambargoyî ra tay merdimî merdî, cinîyanê diganan seba ke nêşîyî nêweşxane domanê xo vînî kerdî. Nê ambargoyî de şarê Mexmûrî zaf zehmetîyî antî. Nê zehmetîyî hema zî dewam kenê.''

Armanc vilakerdişê kampe bi

Çomlekî ard ziwan ke ambargoyê vera kampan bi serran o ke yeno kerdene û vat: ''Bi taybetî serra 1995î de vera Kampa Etrûşî hetê PDKyî ra ambargo amebi kerdene. Înan armanc kerdbi ke kampe vila bikerê. Çunke PDKyî cuya nê merdiman qebul nêkerdêne. 3 mengan ambargoyî dewam kerd. Xeylêk kesî prosesê ambargoyî de merdî. Seke yeno zanayene PDKyî pê pşatdayîşê dewleta tirke no ambargo ardbi ca. Hukmatê Iraqî zî menfaatanê xo ra semed vera ambargoyî bêveng mendêne. Wazenê ke îradeyê ma bişiknê, ma cuya xo ya komunale ra fek vera bidê.''

Seba ke ambargo biqedo ganî asta tewr berze de çalakîyî bêrê kerdene

Mamosta Çomlekî bale ante ser ke şarê Mexmûrî şarêko zanayîye yo û vat: ''Şarê kampe bi serran o ke xo perwerde keno û komelêko polîtîk o. Şarê Mexmûrî tewirê îşxalkeran û PDKyî hol fam keno. Şar vera nê kerdişanê bêexlaqan pê xoverdayîşî tewirê xo mojneno. Dewleta tirke û PDK armanc kenê ke kampe veng bikerê. La şarê kampe vera nê hêrişan yewîya xo hêzêr kena. Aseno ke ambargo do bibo dergêr. Heta ke ambargo bibo dergêr, meseleyî û zehmetîyî zî do bizêdîyê. Hem hetê ekonomîkî ra hem zî hetê weşîye ra rewşêka bitehluke vejîyena werte. Coka seba ke ambargoyê vera kampe biqedo ganî hem Kurdîstan de hem zî teberê Kurdîstanî de çalakîyê hêzêrî bêrê kerdene. Ganî tewirê dewleta tirke û ê PDKyî bêro şermezarkerdene.''