Vorşî hema qica qijkeke bî wexto ke şewe berê înan cîyayêne dadîya ci vatêne şima kam ê înan vatênê ma qicê ko yan zî qicê apo yê. Seba ke herême de wina ameyêne şuxulnayene gerîlayanê azadîye zî hînda sey şarê heremê cewabê înan dayêne.

Dewaka zaf rinkek a Çewlîgî ya ke dormeyê ci pê koyan û derayan xemilyaye yo û  tede zazakî  sey misrayêkê şîîrî yena qalkerdene de  sey dewijanê bînan keyeyê Vorşî zî nasnameyê xo ra dûrî ciwîyayêne. Dima ke qicanê koyî yew bi yew bêrê dewijan kuwayî mezgê înan de çîqêk perayî. Dewijî bi raştîya xo ya tale ameyî têrî û hayîdarê  erjê xo bîyî.

Vorşî ya ke dîyenê qicê koyî senî şewa înan roşn kenê û semedê ardişê rojanê rindan têkoşînê kenê rixmê serranê xo yê qijan pede-pede înan rê nizdî bîyêne. Vorşî hîskerdêne ke nê meymanê şewe de çîyêko cîya, çîyêko taybet esto. Waya ci ya pîle tim vatêne qicanê koyî de tilsemê  cuye esto. Pê ameyîşê gerîlayan dewe de hînda vengê cinîyan bîyêne berz û ê wayîrê heqanê xo vejîyayêne. Reng û ruhêko newe amebi dewe. Kuçeyanê dewe de hinda behsa serewedaritişî ameyênekerdene û dewe de boya azadîye virsayêne.

Keyeyê Vorşî  hetê madî ra feqîr la raştîye de keyeyêko zaf zengîn bî. Sey  keyeyanê kurdan ê bînan keyeyê aye zi sixletî bi, xeylêk waye û birayê ci estbî. Hema ke hîrê-çar serrî bî babîyê ci yo ke kesêko zanayox bi û heme dewanê derûdorî de ameyêne naskerdene hetê dewlete ra mîyanê dewe de ame kiştene. Xora dewlete kurdê ke xo naskenê  û semedê şarê xo çîyêk kenê înan hedef gêna. Vorşî çend bîye pîle no dahîna rind fam kerd.

Seba ke keyeyê Vorşî feqir bi dadîya ci şam nêdayanê qicanê xo,  vatêne ma pawenê wa qicê koyî zî bêrî ma pêro pîya wenê ke wa wer meqedîyo pêrune rê vejo. Xora zafê înan hînda bi nameyê xo ameyêne naskerdene. Gerîlayê ke herême de zaf mendêne sey qicê keyeyî bî. Avreş,  Zaza Hesen, Sîdar, Mustafa, Welat û Rojhat înan ra tay bî.

Qicanê koyî waye û birayanê Vorşî yê girdan ra pîrtukî û kovarî waştêne. Înan bajarî ra ardêne la cade nêgirewtene. Vatêne verê şima biwanê dima ra ma benê.  Vorşî zî  meraq ra dest pê wendişê pîrtûkan kerd. Xora dewe de sey her çîyê bînî wendişê pîrtûkan zî qedexe bi. Coka Vorşî dewijan ra zî mîyan şîyênî hêga de wendenê. Roje pîrtukê wendenê û şewe zî bi embazan derheqê nînan de qalkerdêne.

Vorşî verî vatêne qey ey sey keye û dewe qijanê koyî rê hetkarî kenê. Hêdî-hêdî fam kerd ke qicê koyî yê ke sey tîje şewle danê tarîtîye seba ke şarê kurdî hewnê mergî ra aye bikerî cuya xo danê. Gerîlayan her şewe berê dewijan cinayêne û qebşêkê cuye û çengêkê ûmidî dayêne înan. Dewijan zî xo wela xo ra newe ra afernayêne. Vorşî hînda dîyêne ke qicê koyî têna semedê şimitişê yew çayî nînê keyeyê înan. Ê ruhê azadîye û eşqê cuya vila kenê ke şarê kurdî bitaybetî zî cinîyan koletîye ra bixelisnê.  Dewê ke gerîlayî şinê înan senî ke çuyeyêko bisîhîr bidîyo piro. Nê dewan ke senî ke wisar dare û birr pind kenê a xoza xo newe kena wisarê ganîbîyayîşê şarî dest pê kerd.

Seba ke waye û birayanê Vorşî ra tayînan verê xo da koyanê azadan û tay zî  surgun bîyî berpisîyarîya ci zî zêdîyaye. Hinda karê waye û birayanê xo aye kerdêne û têgêrayîşê azadîye yê kurdan holêr naskerdêne û eşqe gerîlayî famkerdêne.  Nê demî de dejê zaf gîrdî zî antî. Embazê ke reng dayêne şewa înan yew bi yew xebara şehadetê înan girewtî  ke nameyê înan nika qicanê keyeyê înan de yenê ciwîyayene. Reyna  zîndan û surgunî ciwîyaye la ça û senî beno wa bibo mîyanê têkoşîn de aktîf mend ke wa keda qicanê koyî xênîmê aye mebo.  Derheqê têgêrayîşê kurdan de zaf çî wendî, dîyî û ciwiyayî la qet çîyêk hende qicanê koyî ke sey tîje aşme bêrê înan ra kewtêne zerê aye ser tesîr nêkerd û qet çîyêk rê hende  înan  hes nêkerd.