‘Êyê ke vanê ekonomî baş a zûran kenê’

Esnafê cinîyî yê Mêrdînî binê fatureyanê awe, ceyran, gazê xozayî û kîra de fatisîyenê nêeşkenê debara xo ya rojane bikerê. Cinîyan vat: "Ma êdî nêeşkenê biciwîyê û kesê ke vanê ekonomîya Tirkîya baş a zûran kenê.”

Tirkîya û Vakurê Kurdîstanî de krîzêko pîl ê ekonomî esto. Krîzê ekonomî dir hûmara feqîran roje bi roje zêdîyena.

Esnafê cinîyî yê Mêrdînî binê fatureyanê awe, ceyran, gazê xozayî û kîra de fatisîyenê nêeşkenê debara xo ya rojane bikerê. Cinîyan derheqê babete de Jinnewsî rê qisey kerd. 

Muhbete Karaaslana (53) ke tena ciwîyena wina vat: "Ez kesêke tena ya, rewşa mi goreyê xeylêk kesan baş a. La ez êdî bi xo nêeşkena debara xo bikerî. Semedê di quruşan ez serê siba heta şanî de xebitîyena. Roje 20 TL qezenç kena. O zî qîmê çîyêk nêkeno. Tenekeyê rûnî bîyo 350 TL. Pereyê tirkî bê qedir bi û ma hetê ekonomî de kewtî zehmetîyan. Ma pereyo ke qezenç kenê zî danê fatureya ceyran, awe û gazê xozayî. Nika pêro ma rê bîyî luks.”

Cahîde Bîlena ke bi rotişê cil û ceyîzî debara xo kena wina vat: "Ma sey esnafan ne hêrînayîşî ne zî rotişî ra fam kenê. Wexto ke ma çîyêk roşenê ma vanê ma qezenc kerdo. Labelê ez kîra û ceyran dana. Xora hende zam yeno ez nêeşkena faturayan zî bidî. Rewşa ma ya ekonomî êdî baş nîya. Esnafî ver bi mergî şinê. Ma zerar de yê. Êyê ke vanê ekonomîya tirkan baş a zûran kenê.”

Esma Gokdemîra ke bi rotişê ardan debara xo kena wina vat: "Ma sey esnafan na rewşe ra aciz ê. Ez nêeşkena çîyêk biroşa û bihêrîna. Xida, ardî, ceyran û her çî bîyo vay. Tena feqîrî  tesîrê ney de, dewlemendî rewşe ra tu wext zerar nêvînenê. Ma pêro kesê feqîr ê. Ma kîra danê la ma êdî nêeşkenê heqê kîra zî vejê.”

Mulkîye Erguven û Cemîle Erguven ke dewe ra ameyê derheqê vaye de nêrazîbîyayîşê xo ramojnayî û vat: “Ma dewe de şiwanî û bêrîvanî kenê. Ma bi pesdewarî debara xo kenê. La çi heyf êdî no zî qîm nêkeno ke ma bi rehetî nanê xo biwerê. Ma kîra de nîyê. La wexto ke ma yenê bajar ma krîz hîs kenê. Ma nêeşkenê çîyêk bihêrînê.”