Dewleta tirke ya îşxalkere qezayanê Bêgir, Westan, Rêya Armûşê, Tûşba û Erdîşî yê Wanî û qezayanê Tetwan, Edilcewazî yê Bedlîsî de qeraxê Gola Wanî îşxal kerdî. Qeraxê Artemêtan, Westan, Erdîş û Bêgirî de xeylêk dezgehanê taybetan kafe û restaurantî akerdî. Hema hema nê kargehî pêro aîdê terefgîranê AKPyî yê. Gola Wanî û dormeyê ci binê xizmetê dewlete û dezgehanê ci de yê.

Vervatoxê Ekolojîya Zîlane Mîr Bahattîn Demîrî derheqê babete de ANFyî rê qisey kerd û da zanayene ke goreyê qanûnan qeraxî malê komelî yê û nêbeno ke tede bînayî bêrê viraştene. Demîrî pare kerd ke qeraxê Gola Wanî warê SÎTî yê la kapasîteya na SÎTî hema eşkera nêbîya. Demîrî vist vîrî ke bi 'qanûnê pawitişî' zî qeraxî yenê pêşkêşkerdene.

Demîrî vat: ''Vera nê awanîyanê ke qerax de virazîyayê, rêxistinanê xoza dewa akerde û do reyna abikerê. La yeno xîretkerdene ke îşxalê dormeyê Gola Wanî bêro mendekerdene û verê têkoşînê huqûqî û dewayan yeno girewtene. Serê Gola Wanî ra 104 çemî herikîyenê û nînan ra tewr pîl zî Çemê Zîlane yo. La gemarê 20 dewan herikîyeno Çemê Zîlane û uca ra zî şino Gola Wanî. Rixmê xîretanê ma zî verê ney zî nêame girewtene.''

Demîrî ard ziwan ke nê bînayê ke qerax de virazîyayê qanûnê bingeyî binpay kenê û vat: ''Gola Wanî binê rewşêka tehlukeyîne de ya. ÇEDî verî ke cigêrayîşan bikero raporê pozîtîfî dayî HESan û awbendan. Hetêkê bînî ra zî dormeyê gole de ocaxê madenan û mermeran est ê. Goreyê mi no qanûnê pawitişî do hîna zaf awanîyan awan bikero. Nê qanûnî ra nêbîyêne ma eşkayêne pê têkoşînê huqûqî nê talanî vindarnê.''