Nufusê Colemêrgî ciwan o la bi lezî kêmîyeno. Ciwanê Colemêrgî bêkarîye ra koçê metropolanê Tirkîya kenê. Goreyê netîceyanê Sîstemê Qeydkerdişê Nufusî yê Adresî (ADNKS) Colemêrg de mîqtarê ciwanan se ra 23.4 o.

Nufusê Colemêrgî serra 2018î de 286 hezar û 470 bi, serra 2020î de 280 hezar û 514 bi. Ciwanê Colemêrgî bêkarîye ra koçê metropolanê Tirkîya kenê.

Serekê Şubeyê Colemêrgî yê Egitim-Senî Murat Balikesîrî ard ziwan ke şaristan de çimeyo verên ê debare heywankarî ya la wareyî qedexe yê coka heywankarîye qedîyaye. Balikesîrî vat: ''Şîrketê madenî zî çimeyanê binerdî yê şaristanî talan kenê. Ciwanan rê fuhuş û kundoxî yenê ferzkerdene.''

Hemserekê HDPyî yê Colemêrgî Lokman Ozdemîrî vist vîrî ke şaristan de mezunê lîse û zanîngehî bi hezaran ê la pêro bêkar ê. Ozdemîrî vat: ''Na polîtîkaya dewlete ya. Nika nê krîzê ekonomîlî de zî cuya ciwanan û keyeyanê înan bîye giranêr. Semedo ke şaristan de kar çin o ciwanî koç kenê.''

Muhlîs Aslanî (26) da zanayene ke ciwanê ke şinê şaristanan ê bînan pê meaşêkê kêmî xebitîyenê û vat: ''Ciwanê ma qezayanê karî de ya mirenê yan zî birîndar benê. Zaf ciwanê ma zî benê hedefê hêrişanê nîjadperestan. Ez zî neçare manena ke şora şaristanêkê bînî. Dewlete wazena ciwanî wina bêkar bimanê û koç bikerê.''