Qezaya Licê ya Amedî de artêşa tirke 14ê nîsane de operasyonê 3 rojan kerd. Operasyono ke dewanê Dêrxus, Huseynîk û Karahasanî û tay dewekan de ame kerdene de dewa Dêrxusî de birnayîşê daran dest pêkerd. Qirkerdişê daran bi rojan o dewam keno. Qorîcîyê ke bajaranê bînan ra ameyî pê makînayanê karî daran helqê ci ra raqilnenê.

Hemvervatoxê Platformê Pawitişê Hewselî Vahap Işikliyî derheqê babete de qisey kerd. Işikliyî vist vîrî ke her serre wisar de daristananê Kurdîstanî de qirkerdişê daran yeno kerdene, daristanî yenê vêşnayene û vat: ''Gama ke herême de operasyonê leşkerî dest pêkene verî daran birnenê û daristanan vêşnenê. Herêma Licê de 14 nîsane de dewanê Dêrxus, Huseynîk û Karahasanî de opersyonê 3 rojan ame kerdene. Dewa Dêrxusî de binê kontrolê leşkeran de darî ameyî birnayene.

Cûdî ra heta Besta, Bedlîsî ra heta Dêrsimî bi mangan o darî yenê birnayene û daristanî yenê vêşnayene. Platformê ma gama ke semedê şewatê daristanî û birnayîşê daran de zanayîş bigêro Şirnex de bi uca xebere girewt ke Licê de darî yenê birnayene. Kurdîstan de şewatê daristanî û birnayîşê daran sey derba ke tira gonî yena dewam kenê.''

Işikliyî wina dewam kerd: ''Seba ke îxale bigêrî projeyanê neweyan kenê. Nê semedî ra daran birnenê. Daranê birnayeyan roşenê. No çîyo normal nêyo, pabesteyê polîtîkaya şerî yo. Kurdîstan de verî û dimayê operasyonê leşkerî darî yenê birnayene. Kurdîstan de gama ke şewatê daristanî vejîyenê şar pê îmkananê xo hewna keno. Selahîyetdarê dewlete herinda hewnakerdişê şewatî de şarî rê benê asteng.''

Işikliyî vat: ''Wezîrîya Zîret û Daristanî par raporêkê xo de eşkera kerd ke 19 herêman de şewat vejîyayî. Çi heyf ke şewatê Licê yo ke  bi rojan dewam kerd rapor de ca nêgirewt. Tîya ra zî yeno fehmkerdene ke vera xozaya Kurdîstanî polîtîkayê taybetî yenê rayraberdene.

Dêrxus de koyêko qic esto ke wird hetanê ci de darî helqê ci ra yenê raqilnayene. Pê makînayanê karî daran helqê ci ra raqilnenê. Na herême de darî nêverdayî. Ma waşt şirê herême la destûr nêdîya. Şewatê daristanî û birnayîşê daran her serre bi hewayêkê sîstemakî yenê kerdene. Wazenê ke herême bikerê bêmerdim. 6 mengî verê cu badê operasyonê Cûdîyî darî ameyî birnayene û bi destê qeyûmî ameyî rotene. Cûdî bêdar verda. Darê melengiçî yê ke çimeyê debarî yê şarî yê helqê ci ra raqilnayî. Daristanî ê ma pêrune û ganî ma pêro pîya wayîrê ci bivejîyê.''