Qezaya Pulurî ya Dêrsimî de Çimeyê Munzurî binê nameyê 'turîzmî' de bi projeyêkî seba rantî yenê pêşkêşkerdene. Roniştox, rêxistinê komelê sivîlî û dezgehê xoza proje tesdîq nêkenê. La Walîtîya Dêrsimî nika ra standê esnafan wedaritî. Walîyî zî vizêr şarê Dêrsimî eşkerayîya xo de kerdbi hedef.

Dewijanê Zîyaretî derheqê mesele de qisey kerd. 

Dewij Hasan Akdoganî vat: ''Munzur Baba erjê elewîyan o. Ma bi serran o ke Çimeyanê Munzurî de îbadet kenê. Dewlete seba projeyî fikrê ma nêgirewtî. Ma nê projeyî nêwazenê, ma do nêverdê ke îbadetxaneyê ma texrîb bibo. Jîyargeyê ma seba ma erjîyaye yo.''

Dewije Gulîzare Gun vist vîrî ke ê bi solan zî nêşinê Çimeyan û vat: ''Nika uca de merdimî dekewenê aw, pîknîk kenê, firaqan şiwenê. Ma wazenê ke jîyargeyê ma sey verî bimano. Wazenê destê ma ra jîyargeyê ma bigêrê. Ma qet destûr nêdanê ney. Eke hewce bo ma verê Munzurî de bendan virazenê. ''

Hasan Şengulî da zanayene ke aslê xo de proje 4 serrî verê cû dîyabi destpêkerdene la nêrazîbîyayîşanê şarî ra nêame caardene. Şengulî vat: ''Ganî vera nê projeyî şar bibo yew. Sewbîna çare çin a.'' 

Raîf Çelîkî pare kerd ke ê do nê projeyî asteng bikerê û vat: ''Ma do wesayîtanê karî bidê kerrayan ver. Tîya seba bawerîya elewîyan fîraz a. Eke kepçe dekewo uca verê awe vurîyeno. Xizir na awe de bîyo sir. Ma vanê ney.'' 

 Dewijê bînî Zekî Gunî vat: ''Awa tîya şîfa bî. Nika tede merdimî asnawe kenê, pîknîk kenê. Eke kepçe debikewo tîya cara xoza zî herimîyena. Beno ke awa ma zî verê xo bivurna. Ma do heta tîya de bibê vera naye têkoşîn bikerê.''