Vera hêrişanê dewleta tirke û Îranî yê serê Herêma Kurdîstanê Federalî bêvengîya hukmatê Iraq û Başûrê Kurdîstanî dewam kena.

Herêma Kurdîstanî ra 226 aktîvîst û roşnvîran venga hukmatê herêma Kurdîstanî û Iraqî da ke hêrişanê dewleta tirke û Îranî vindarnê.

Eşkerayîye de ame parekerdene ke hêrişê dewleta tirke û Îranî tehlukeyanê pîlan û tersêka pîle virazenê. Eşkerayîye de wina ame vatene: ''Hêrişê dewleta tirke ya îşxalkere û Îranî serdestîya hukmatanê Iraq û Başûrî peygoş kenê û dûştê pêro krîteranê huqûqê mîyanneteweyî yê. Ganî sere de Amerîka û Ewropa ganî Neteweyê Yewbîyayeyî verê nê gefan û hêrişan bigêrê. Ma venga Serekkomarê Iraqî, Serekwezîranê Herêma Kurdîstanî û Iraqî û Serekanê Parlamentoyê Iraq û Kurdîstanî danê ke vera nê gefan û binpaykerdişan cade tewirêkî bigêrê, îşxalê Îran û Tirkîya vindarnê.''