Layê Goynukî yê dewa Çeltîkî ya merkezê Çewlîgî de dima ke tesîsê eşteyan ê Fabrîkaya SUTAŞî dest pê xebate kerd maseyî merdî, heywanî bîyî nêweş û merdimê ke kewtî la de nêweşîye vejîyaye.

Rixmo ke selahîyetdaranê dewleta tirke îdîa kerd ke nêweşî û mergê heywanan tesîsî ra nê kanalîzasyonî ra qewimîyenê dewijan pare kerd ke tesîsî ra verî serebûtê winasênî qet nêqewimîyayêne.

Mixtarê dewa Çeltîksuyî Yuksel Gurdegîrî da zanayene ke înan waştişname dayo Mudirîya Weşîye, Îdareyê Taybetî yê Şaristanî, Mudirîya Xoza û Wezîrîya Xoza û Daristanan. Gurdegîrî vat: ''Nînan ra yewî zî cewab nêda ma û nînan derheqê SUTAŞî de zî çîyêk nêkerd. Mi rayêk selahîyetdaranê SUTAŞî de qisey kerd, înan mi rê vat ke hînî awe pak a. La reyna maseyî mirenê. Ma wazenê wa selahîyetdarî awe ra nimûne bigêrê, cibigêrê. Domanî şinê kewenê awa layî û dima bedenê înan kênîyeno, beno sûr. Eke na mesele nêra çareserkerdene pêro Çewlîg de do biba mesele.''

Vervatoxê Meclîsê Pêroyî yê HDPyî yê Çewlîgî Îmdat Morsumbulî zî dîyar kerd ke key tesîsê SUTAŞî ameyo qirkerdişê xoza zî dest pêkerd. Morsumbulî vat: ''Mudirîya Xoza lezî ra raporêk amade kerd û vat nê çîyî kanalîzasyonî ra qewimîyenê. Dezgehê umûmîye ganî sermaye nê weşîya şarî bipawê. Erk û mesuldarîya ma ya ke ma aw, xoza û daristananê xo bipawê. Ma tapuyê Çewlîgî nêdê SUTAŞî.''