Komîteyanê Zîndanan ê PKK-PAJKî bi eşkerayîyêke kesê ke Qirkerdişê Zîndanê Tîpê E yê Amedî de 24ê êlula 1996î de şehîd bîyî û pêro şehîdê zîndanî yad kerdî û seba pîlkerdişê têkoşînî veng da.

Eşkerayîye wina ya:

''Tarîxê dewleta tirke tarîxê qirkerdişan o. Bi seyan qirkerdişanê vera kurdan, armenî, yunan, elewî û sosyalîstan rejîmo nîjadperest o faşîst awan kerd. Hetê bînî ra nê nêzdîbîyayîşê qirkerî sey polîtîkaya şerê taybetî vera zîndanan zî visîyayî dewre û bi nê hewayî hem vera têkoşêran hem zî vera komelî û hem zî vera welatperweranê şorişgêran teslîmîyet ame ferzkerdene. Qirkerdişê Zîndanê Amedî yê 24ê Êlula 1996î zî nînan ra yew o.

Tepişteyanê azadîye yê ke bedenê nînan ra ber çîyê nînan çin o ke bipawê, 24ê êlula 1996î de vera îxanet û îtîrafî bendêkê xoverdayîşî awan kerd. Înan nêverda ke alaya xoverdayîşî ya Mazlûm Doganî û şehîdanê Rojeyê Mergî yê Pîlî yê 14ê Temmuze bikewa war. 10 embazê koyîjî yê ke rêça xoverdayîşî teqîb kerdêne, bi hawayêkê barbarî hetê kolonyalîst, faşîst û qirkeran ra ameyî qetilkerdene. Bi nê ferzkerdişî şexsê tepişteyanê azadîye de ame waştene ke PKK û komelê kurdan bêrê teslîmgirewtene. Serkêşîya Rayber Apoyî de xoverdayîşê embazanê ma armancê înan pûç kerdî.

Hukmatê Ana-Yolîyo ke destpêkê 1996î de bibi îqtîdar, seba ke PKK biqedîno xîret kerd. Hêrişê  Amedî zî polîtîkayanê ê çaxî ra yew bi ke 6ê gulana 1996î de vera Rayberê ma bi bomba amebi kerdene. Hêrişanê barbaran ê cergan her ca de dewam kerd. Faşîzmî bi îşkenceyî çinkerdişê merdimanê bêpawitişan kerd armanc. Bi heybetîya xoverdayîşê vera wehşetî reyna ame mojnayene merdimîye de îrade senî beno meşaleya cuyêka rûmetêne. Nê hêrişî de embazê ma Mehmet Aslan, Ridvan Bulut, Nîmet Çakmak, Cemal Çan, Ahmet Çelîk, Kadîr Demîr, Edîp Dîrekçî, Sabrî Gumuş, Erkan Perîşan û Hakki Tekin şehîd bîyî.

Amed de bi desan şorişgêran xo ver da û rîpelêko newe tradîsyonê ma yê xoverdayîşî de akerd. Nê embazan bi îradeyê xo mojna dişmenî ke ferzkerdişê şerê taybetî do netîceyêke nêdo. Embaz Vedat Aydemîr û Hamdullah Şengunerî cewabêko heybetîn o winayên da. Înan heman roje û çaxe de bedenê xo da adirî ver û tewrê prosesê xoverdayîşî bîyî. Bi nê hewayî 12 embazê ma şehîd bîyî.

Ewro zî hêrişê faşîzmî astêka berze de vera tepişteyan dewam kenê û înan rê teslîmîyet yeno ferzkerdene. Vera ney ma şahîdê xoverdayîşê pîlî yê biîrade-hişmendî yê tepişteyan ê. Zîndanan de ke vurîyayê îşkencexaneyan tepişteyê nêweşî nênê dermankerdene û bi nê hawayî polîtîkaya qirkerdişî yena caardene. Serra peyêne de 50 tepişteyî ameyî qetilkerdene û na rewşe serranê peyênan de zêdîyena û sey polîtîkaya qirkerdişî dewam kena.

Ma 12ê embazanê xo yê şehîdan ê 24ê êlula 1996î, şehîdanê xo yê peyênan Îbrahîm Yildirim, Mehmet Candemîr, Bazo Yilmaz û Nevzat Çapkin bi rêzdarî û minetdarî yad kenê û şexsê înan de ma pêro şehîdanê xo yê zîndanan rê soz danê ke vîrameyîşê înan biresnê serkewtişî û qesasê înan bigêrê. Seba xurtkerdişê xoverdayîşê zîndanan ma venga pêro dezgeh, dorme û kesayetanê şorişgêr, welatperwer û demokratîkan danê ke wa polîtîkayanê qirkerdişî yê zîndanan vindarnê û vera faşîzmî xoverdayîşî berz bikerê.''