Fermandaranê YJA-Starî ra Ferîde Alkan bi wesîleya serrgêra Komployê Mîyanneteweyî yê 9ê Teşrîna Verêne ya 1998î ANFyî rê qisey kerd.

Qiseykerdişê Alkane ra beşêk wina yo:

''Rayber Apoyî 24 serrî yo vera sîstemê tecrîd û îşkenceyî yê tewr giranî xo ver dano. Nê 24 serran de ma zî têkoşînê xo kerd, bedelî û şehîdî dayî. Ne 24 serran de cepheyê têkoşînê ma tim bîyo pîlêr û sînoranê Kurdîstanî ra derbaz kerd. Seba azadîya Rayberîye nika asta dinya de kampanya û çalakîyî yenê kerdene. Cinî, ciwanî, karker, xozaperest, antîkapîtalîstî dormeyê Rayberîye de ameyî pêser.

Eşkera yo ke komplogerî bin kewtî û nêeşkayî armancanê xo bîyarê ca. Hêzê kapîtalîstî nika mîyanê krîzêkê pîlî de yê. Rayberê ma mîyanê şertanê  Îmraliyî de zî seba şarê ma çareserîya vera sîstemê kapîtalîstê modernî eşkera kerd, dî. Paradîgmaya Rayberê ma ewro pêro dinya rê bîye hêvî.

Komplogeran waştêne ke Rayberê ma û şexsê ey de têgêrayîşê ma yê azadîye îmha bikerê yan zî bêtesîr bikerê, bi nê hawayî bingeyê menfaetanê xo yê emperyalîstan de Rojhelatê Mîyanênî newe ra dîzayn bikerê. Yanî înan xîret kerd ke Şerê Dinya yê 3. rê xo amade bikerê. Komployî ra dima Amerîka mudaxeleyê Afganîstanî kerd, Tirkîya de îslamo sîyasî bi îqtîdar. Komployê 9ê Teşrîna Verêne zî hêrişê DAÎŞî zî vera Rayberê ma, têgêrayîşê ma û şarê kurdî planê îmha û qirkerdişî bîyî. La hayîya Rayberê ma pê nînan est bîyê.

Tirkîya nika reyna 2015 ra nata çarçewa 'Planê Çokdayîşî' de kena ke kurdan û têgêrayîşê ma îmha bikera. Proseso newe yê Komployî çar parçeyanê Kurdîstanî de dewam keno. Dewleta tirke bi şerê taybetî hêrişê kurdan û têgêrayîşê ma kena. Seke zanîyeno dewleta tirke serrgêra 20. ya Komployî de Efrîn îşxal kerdbi. Nika zî bi çekanê kîmyewîyan û bombayanê nukleran hêrişê Herêmanê Pawitişî yê Medya kena.

Bedelê ci se beno wa bibo têgêrayîşê ma PKK û PAJK vera hêrişan do bin nêkewê. Gerîlayê azadîye yê Kurdîstanî do koyan de bi serkewtişî û caardişê azadîya Rayber Apoyî vera Komployê 9ê Teşrîna Verêne cewab bidê. Netîceyê şerî yê nikayênî mojnenê ke gerîlayî bi hawayêkê bêhempayî bi înîsîyatîfê xo senî têkoşîn kenê.''