Amed de serkêşîya TJA û Meclîsê Cinîyan ê DBPyî de 16ê teşrîna verêne de Meydanê Îstasyonî de mîtîngêk ame kerdene. Mîtîngo ke bi şîarê ''Nîjadperestîye û cînsîyetkarîye rê bes o, nika wextê azadîya cinîyan o' ame kerdene de  cinîyî raştê hêrişê polîsan ameybî.

Cinîyan ê  TJA û DBPyî ewro verê banê DBPyî bi çalakîyêke hêrişê polîsan şermezar kerdî. Eşkerayîye hetê Hemsereka DBPyî ya Bajarî Sevale Gulmez ra ameye wendene. Gulmeze ard ziwan ke îqtîdaro ke hêzê cinîyan ra  terseno pê hêrişî wazeno verê înan bigîro û derheqê qewimîyayîşanê mîtîngî de nê  vat:

''Deyîrê ke qala serewedaritişê cinîyan ê vera sîstemê camêrdê serdestî kenê ameyî qedexekerdene. Pankartî ameyî qedexekerdene û destûr nêdîya ke cinîyî pê renganê xo tewrê mîtîngî bibê. Cigêrayîşê serê cinîyan sey tacîzî ameyî kerdene. Senî ke zîndanan de yeno kerdene ame waştene ke cigêrayîşê bari bêro kerdene. Îktîdar wazeno Kurdîstanî bikero zîndano akerde. Kontrolê kodê HESî tam açarya îşkenceyî. Dest nîya malzemeyê cinîyan ser. Avûkatanê Komeleya Cinîyan a Roza ra Elife Tirenç Îpeka ke nêwaşt serê ci bêro cigêrayene bi derbkerdişî ameye destbendkerdene.''

Gulmeze  wina dewam kerd: ''Tehemulê laçikanê dayîkan ma nêkerd. Bîlasebeb destbendkerdişî ameyî kerdene. Dayîke ma ameyî derbkerdene. Êyê ke serê dîn û dayîkîye ra sîyaset kenê Mayê Haştîye destbend kerdî camî de dayî pawitene. Gama ke Hemsereka DBPyî Salîha Aydenîz gala tecrîdê serê Birêz Ocalanî kerdêne polîsan vegê muzîkî kerd berz ke wa venê aye mevejîyo.''

Gulmeze bala ante têkoşînê cinîyan o ke tim pîlêr beno ser û vat: ''Ma nê tersê vera hêzê cinîyan fehm kenê. Hukmat pê nê hêrişan wazeno payra bimano. Ma nê nêzdîbîyayîşê vera dayîkan û cinîyan ê azadîwaştoxan ê ke tewrê mîtîngê ma bîyî, şermezar kenê. Ma do pê ronayîşê rejîmê huqûq û demokrasîyî hesabê naye bipersê. Ma do vera zextanê şima peyser game meerzê. Ma do verê polîtîkaya şima ya teslîmgirewtişî de milê xo çewt nêkerê. Vera heme hêrişanê ke vera îradayê ma yene kerdene ma do rêxistinbîyayîşê xo pîlêr bikerê.''