Kurdîstanijî û şarê Tirkîya rîyê polîtîkayanê ekonomîyî yê dewleta tirke ra mîyanê krîzêkê girdî de yê. Şar nêeşkeno îdareyê xo bikero. Îqtîdarê AKP-MHPyî herinda çareserkerdişê problemî de rojemî bedilneno. Amedijan derheqê problemanê ekonomîyî de qisey kerd.

Ridwan Taş: Rewşa ekonomî her roje xirabêre bena. Ma vînenê ke şar bazaran de werê helisîyayeyî arêdano. Ganî wîjdanî na rewşe qebul nêkerê. Şar vêşan o, çî-mîyê xeripîyayeyî beno keye. Rewşa bêkarîye hende bîya xirabe ke gama ke İş-Kur  vano hezar û 350 kesî lazim ê 13 hezar kesî muracat kenê. Şar saetanê şanî paweno ke wa bazar de fîyetî biney bêrê war. Rewşe wina bîya xirabe ke esnaf zî nêeşkeno zerzewat û fêkî bêro keyeyê xo.

Veysi Kaplan:  Ma hinî nêeşkenê senî biwazê wina biciwîyê. Ez şîya mi lazut çîna la wayîrê yegayî herinda yewmîya mi de lazut da mi. Ez zî nika tîya roşena. Nê şertê bêkarîye û bêpereyîye keye de zî huzurê ma nêverda. Verdayîşê ke demê peyênî de zêdîyayî rîyê feqîrîye ra yo. Berpirsîyarê îqtîdarî vanê ekonomî hol a la tîya şar hinî çopî arêdano.

Şukru Uner: Ma hinî nêeşkenê çîk bihêrînê.  Krîz zaf bîyo xorî. Şar nêeşkeno îdareyê xo bikero. Tayyip Erdoganî her çî rot. Nika destê ci de çîyo ke biroşo nêmend coka şino şarî ser. Ma mecburê ke Tayyipî bişawê. Wa hinî yewna bêro. Mêrik nêeşkeno welatî îdare bikero, têna xizmetê zengînan keno. Têna talan est o, çîyêko bîn çîn o.

Kadir Şeker:  Rîyê krîzê ekonomîkî ra esnaf nêeşkeno çîyêk biroşo. Şar zî têna fîyatan perseno û xo peyde anceno. Ma tim pê vayîye benê hîşar. Ma hinî eciz bîyî. Ma yew rewşe de yê ke mecbûr dikanê xo qefilnenê. Hinî hêvîya ma nêmendê. Ma têna wazenê vêşan memanê û hewceyê çewnayî mebi.