Dewleta tirke ya îşxalkere 14ê nîsane ra nata Zap, Matîna û Avaşînî de bêmabên hêrişê gerîlayan kena. Dewleta îşxalkere seba ke xoverdayîşê gerîlayan bişikna her tewirê metodê gemarinî ana ca.

Artêşa îşxalkere çar menganê peyênan de bi çekanê kîmyewîyan, gazê jehrînî, bombaya termobarîkî, bombaya nuklere ya taktîkî erjanê merdimîye binpay kena la reyna zî pê xoverdayîşê gerîlayan nêeşkena.

Artêşa îşxalkere narey zî pê kepçe û dozeran xîret kena ke çeper û tunelanê gerîlayan birijna û xo serkewte bimojna. Girê Werxelê yê Avaşînî de ke tede şerêko çetin est o, artêşa îşxalkere xîret kena ke pê kepçe û dozeran çeper û tunelanê gerîlayan birijna.

9ê tebaxa 2022yî de dîmenêk ame qeydkerdene. Dîmenan de aseno ke kepçe û dozerî kenê ke tunel û çeperan birijnê. Çimeyanê herême dîyar kerd ke artêşa îşxalkere xeylêk reyî sînorê Tirkîya ra kepçeyî ardê Girê Werxelê.

Dîmenê qeydkerdeyî de aseno ke wexto ke dewleta tirke kepçe û dozerî ardêne Avaşînî, PDKyî zî mabênê Waranê Xoverdayîşî yê Girê Hekarî û Girê Amedîyê yê Zapî de bi kepçeyan artêşa tirke rê rayîrî viraştêne.

ANFyî rojêke verî dîmenêk weşanabi ke 27ê tebaxa 2022yî de amebi qeydkerdene. Dîmenan de aseno ke hêzê PDKyî bi 2 kepçeyanê pîlan, 5 buldozeran û 5 wesayîtan kenê ke mabênê waranê xoverdayîşî de rayîran abikerê.