Hemserekê Konseya Rayberdişî ya KCKyî Cemîl Bayikî Bernameyê Taybetî yê Stêrk TVyî de Komployo Mîyanneteweyî yê 9ê Teşrîna Verêne û babetê rojdemî ercnayî.

Bayikî qiseykerdişê xo de verî şehîdê menga teşrîna verêne û şehîdê 'Şima nêeşkenê tîja ma tarî bikerê' yad kerdî û Komployê 9ê Teşrîna Verêne yê vera Rayberê Şarê Kurdî Abdullah Ocalanî şermezar kerd.

Qiseykerdişê Bayikî ra beşêk wina yo:

''No komplo vera pêro şaran û merdimîye ame kerdene. Komplogerî wa hînî bivînê ke nê komployî çita rê xizmet kerd û israrê komployî û sîyasetê xo yê vera kurdan û PKKyî ra fek vera bidê. Rayber Apoyî seba çareserîya meseleya kurdan tim têkoşîn kerd. Na mesele Ewropa afernaye la nêwaşte çareser bikera. Çunke çareserîya meseleya kurdan hesabê înan rê nêna. Tecrîdî rê zî têna Tirkîya nê Ewropa zî mesuldar a. Komplogeran seba ke Rojhelatê Mîyanênî de alozîye dewam bikera waşt meseleya kurdan nêra çareserkerdene. Coka nê komployî hedef kerd ke Rayber Apo bi temamî çin bikero. Ewro pêro dinya de têkoşînê vera Komployî dewam keno. Hînî komplogerî wa sîyasetê xo de israr mekerê, xo bidê efûkerdene. Heta ke meseleya kurdan zî çareser nêba komplo do dewam bikero. Eke ma Hemleya Wextê Azadîye hîna xurt bikerê eşkenê komployî bin bikerê û azadîya Rayber Apoyî bîyarê ca.

CPT teda û çalakîyanê şarî ra dima neçare mendo ke şoro Îmrali. Çunke înan dî ke şarî wayîrê Rayber Apoyî vejîyenê. CPTyî vat ke ê do 6 mengan ra dima raporê xo eşkera bikerê û seba cewabî zî 6 mengan do bidê dewleta tirke. Ê resmen pê kurdan tarfû kenê. CPT ganî cade raporî şarî reyde pare bikero. Ganî şarê ma, roşnvîr, hunermend û avûkatê ma zî ney biwazê, tedaya CPTyî bikerê.

Çalakîya Mersînî ya embaze Sara û Rûkene çalakîyêka pîl û serkewte ya. Dewleta tirke her cayê Kurdîstanî de şarî rê zulm kena, xozaya Kurdîstanî talan kena, zîndanan de embazanê ma qetil kena, vera gerîlayan bombaya nuklere û çeka kîmyewîye şuxilnena, Başûr, Rojawan, Şingal û Mexmûr de zî sîyasetê qirkerdişî kena. Xora şarê kurdî vera dewlete heqê xo yê pawitişî do bişuxilno. Çalakîya embaze Sara û Rûkene zî no kerd. Êyê ke na çalakîye rexne kenê, kerdiş û hêrişanê dewleta tirke rexne nêkenê. Ganî her kes çalakîya Sara û Rûkene ra dersan bigêro û bi hawayêkê raştî nêzdîyê na çalakîye bibo. Nê wird cinîyî verê zulmê dewlete de vindertî. Na xeta pawitişî ya. Kesê ke vera na xete vindenî bêwijdanî û bêîmanî kenê.

Rojhelatê Kurdîstanî û Îranî de serewedaritişê cinîyan vurîya bi serewedaritişê pêro komelî. Ganî dewleta Îranî goş bida şar û cinîyan ser. Dewleta Îranî nêeşkena pê şîdetî meseleya çareser bikera. Ganî meseleyî pê dîyalogan çareser bibê. Cinîyê kurdî û îranijî seba demokrasî û azadîye têkoşîn kenê. Serewedaritişê nê cinîyan pêro cinîyê dinya weriznayî payan ser. Dewleta Îranî nê serewedaritişî ra kurdan sey mesuldaran vînena. Coka hêrişê kurdan, dezgeh û partîyanê kurdan kena. Ganî dewleta Îranî bi dîyalogan kurdan de meseleya xo safî bikera. Şîdet meseleya kurdan çareser nêkena, eqsê ci giran kena.

Ez embaze Nagîhane Akarsel bi rêzdarî yad kena. Aye şarê kurdî û cinîyan ê kurdan rê zaf xizmet kerd. Ma do qetî armancanê aye bîyarê ca. Embaze Nagîhane seba ke xizmetê winasênî kerdê qestî ra ameya hedefkerdene. Dewleta tirke xora tim embazanê ma yê serkêşan kena hedef. Jineolojîya ke embaze Nagîhane kede dayêne ci, îdeolojî û eserê Rayber Apoyî ya. Yanî embaze Nagîhane wayîra Rayber Apoyî vejîyayêne. Ewro zî cinîyê kurdî ganî wayîrê aye vejîyê.

Şarê ma Soranî, Silêmanî şarêko welatperwer o. Dewleta tirke û PDK seba ke nê şarî teeslîm bigêrê herêma Soranî de suîkastanê winan kenê. PDK wazeno roşnvîrîya Soranî vilayê Behdînanî nêba. Ganî her kes vera nê kerdişî tewirê raştî bigêro, vera Barzanîyan, dewleta tirke û tirkmenan de vindero. Wa cinî, şar, hunermend û roşnvîrê Soranî wayîrê tarîxê xo vejîyê. Embaze Nagîhane seba herêma Soranî kedê pîlî dayî. Eke şarê Soranî wayîrê embaze Nagîhane vejîyo eşkeno PKKyî rê deynê xo bido.

Dewleta tirke vana 'yew meseleya ma bi kurdan çin a, meseleya mi PKK de est a', barzanîyî zî vanê 'dewleta tirke rîyê PKKyî ra hêriş kena.' Wina vanê la dewleta tirke têna hêrişê gerîlayan nêkena. dewleta tirke kamca de kurdî est bê hêrişê înan kena. Rayber Apo û gerîlayî vera ney têkoşîn kenê, kurdan qirkerdişî ra xelisnenê, kurdan kenê wayîrê nasnameyî. Ewro gerîlayî 24 saetan pê çekanê kîmyewîyan, bombayanê nuklere û termobarîkan, tank, top, helîkopter û teyarayan dîyenê bombayan ver. Gerîlayî ge ge vêşan û têşan manenê, binê stresî de yê la seba şarê kurdî qehremanîye kenê.

Dewleta tirke seba ke pê gerîlayan nêeşkaye Barzanîyî vistî dewre. Barzanîyî qoricîyê Başûrî yê. PDK hînî nêeşkeno binimno ke hetê dewleta tirke de şer keno. PDK vazda xo resna hewarê dewleta tirke. Yew eleqeyê înan bi kurdayetîye çin o. Nika şer astêka bîne de yo. Gerîlayî erkanê xo anê ca la pêro bare milê înan ser de ya. Embaze Sara û Rûkene pê çalakîya xo bare kerde milê her kesî.

Barzanîyî se kenê têna seba menfaetanê xo kenê. Barzanîyî vanê qey eke PKK bêro tasfîyekerdene her çi do înan rê bimano. La xêrê PKKyî ra ê wayîrê hende îmkan û firsendan ê. Balîsan de PDKyî di embazê ma şehîd kerdî, hîrê embazê ma zî birîndar kerdî. Înan vat dewleta tirke kerdo la bi xo hêrişê embazanê ma kerdo. Heta nika PDKyî derheqê serebûtê Gelîya Balîsanî de eşkerayîyêke nêdaye. Verî zî înan embazê ma şehîd kerdî û cenazayê şehîdanê ma o çax zî nêdayî. Seke mi vat yew eleqeyê înan bi kurdayetîye çin o.

Îqtîdarê AKP-MHPyî vera kurdan şerê taybetî keno. Êyê ke Sûr de kerrayêke nêverdaya nika uca de festîvale serûber kenê. Tek derdê înan asîmîlekerdişê kurdan o. Ganî şarê ma tewrê na festîvale nêbo, verê ci vejîyo. Festîvala winasêne seba Sûrî û Amedî şermêka pîl a. Kurdî hînî kerdişanê înan xo vîr a nêkenê.

Îtîfaqê Kede û Azadîye her ke şino beno pîlêr. No îtîfaq rayîro hîrêyîn o û vera beno pîlêr. Ganî şarê ma hetê nê îtîfaqî de ca bigêro. Her kes zaneno ke HDP do nê weçînayîşan de rolêkê dîyarkerî bîyaro ca. Komplogeran AKP-MHP ard îqtîdar û nika zî ê wazenê pê destê AKP-MHPyîi komployî temam bikerê, PKKyî tasfîye bikerê. Seba ke îqtîdar de AKP-MHP bimano komplogerî kenê ke HDPyî qels bikerê. Êyê ke îtîfaqê Kede û Azadîye û HDPyî qels kenê xizmetê AKP-MHPyî kenê, xizmetê qirkerdişî kenê. Nê weçînayîşî de no îtîfaq do qederê welatî bivurno. Ez venga her kesî dana ke mîyanê nê îtîfaqî de cabigêro. Çunke eke no îtîfaq bihêz bibo şima eşkenê xo destê faşîzmî ra bixelisnê.''