Dronanê dewleta Îranî hêrişê hêzanê Rojhelatê Kurdîstanî yê ke baregehê înan Başûrê Kurdîstanî de est ê kerd. Hêriş de tewr tay 7 kesî ameyî qetilkerdene û 24 kesî birîndar bîyî.

Hêrişan de herême Silêmanî û Hewlêrî ameyî hedefgirewtene. Xeylêk warî bi rojan o bêmabên yenê bombardumankerdene. Partîya Demokratîke ya Kurdîstanî ya Îranî (PDK-I), Komeleyê Kedkeranê Şorişgeran ê Kurdîstanî yê Îranî û Partîya Azadîye ya Kurdîstanî (PAK) û warê sîvîlan ameyî hedefgirewtene.

Wezîrê Weşîye yê Herêma Kurdîstanî Saman Berzencî da zanayene ke heta nika hêrişan de tewr tay 7 kesan dinyaya xo bedilnaye û 24 kesî birîndar bîyî û vat beno ke bîlanço giranêre bibo.

Qezaya Koye yê Hewlêrî de PDK-I ame hedefgirewtene, 4 kesan dinyaya xo bedilnaye, 14 kesî birîndar bîyî. Qezaya Pirdê de zî PAK ame hedefgirewene, 3 kesan dinyaya xo bedilnaye û 10 kesî birîndar bîyî.

Hukmatê Federalî yê Kurdîstanî hêrişê ke herra ci de vera sîvîlan yenê kerdene şermezar kerdî û waşt wa nê hêrişî cade bêrê vindarnayene.