Merkezê Îrtîbatî û Çapemenîye yê HPGyî da zanayene ke çar gerîlayî Zap de şehîd bîyî û nê pare kerdî:

‘’21ê hezîrana 2022yî de hêrişanê dişmenî yê  waranê cîya cîyayan ê ke pabesteyê Çemoyê Zapî yê de fermandaranê ma yê serkêşan ê Hemleya Bazanê Zagrosî ra Tirêj, Şaho, Şahîn û Dara yê ke têkoşînê tarîxkî kerd, tewrê kerwanê şehîdan bîyî. Ma soz danê ke heta ke ma qesasê heme şehîdanê xo bîgêrê û xeyalanê înan ê azadîye bîyarê ca ma do têkoşînê xo bi hewayêkê qerardarî bidomnê. Sere de keyeyanê erjîyayeyan ê hemrayanê ma yê qehremanan Tîrej, Şaho, Şahîn û Dara ma pêro şarê welatperwerî yê Kurdîstanî rê serweşîye wazenê.

Nasnameyê hemrayanê ma yê şehîdan wina yê:

Nameyê Qodî: Tîrêj Dijwar Name û Peyname: Vedat Îşsîz Cayê Bîyayîşî: Şirnex Maye-Pî: Saîme - Mehmet Tarîx û Cayê Şehadetî: 21ê Hezîrena 2022yî / Zap

Nameyê Qodî: Şaho Qendîl Name û Peyname: Amanc Heme Şerif Cayê Bîyayîşî: Seyîd Sadiq Maye-Pî:  Hamîde – Heme Şerif Tarîx û Cayê Şehadetî: 21ê Hezîrena 2022yî / Zap

Nameyê Qodî: Şahîn Baran Name û Peyname: Agît Aytiş Cayê Bîyayîşî: Şirnex Maye-Pî: Kudrete - Hasan Tarîx û Cayê Şehadetî: 21ê Hezîrena 2022yî / Zap

Nameyê Qodî: Dara Xelîla Name û Peyname: Bayram Erbek Cayê Bîyayîşî:Sêrt Maye-Pî: Nazîre - Fendî Tarîx û Cayê Şehadetî: 21ê Hezîrena 2022yî / Zap

Hemrayê Tirêj Dijwar Dêrgulê Şirnexî de yeno dinya û Cizîre de pê kulturê eşîrê botî beno pîl.  Gama ke babîyê ci hetê dewleta tirke ra yeno tepiştene, partîya ma PKKyî nas keno. Bado ke tewrê xebetan beno o zî yeno destbendkerdene û tewr peynî de verê xo dano koyanê azadan ke qesasê şarê xo bîgêro. Hemrayê ma Tîrêj Metîna de dest pê gerîlatîye keno û Qaşûra xebatanê verênan keno. Badê perwerdeyan  verê xo dano Zagrosan.  2021 de sey fermandarê qolî tewrê çalakîya Ciloyê Biçûkî yê Girê Şehîd Munzurî beno û îşxalkeran serî ra çeke wedareno. Avaşîn û Zap de tewrê xeylêk çalakîyan beno û nê çalakîyan koordine keno û beno fermandarêko serkewte. Hemrayê ma Tîrêj bi fermandarîye, hemrayîye, cesaretê xo yê şerî û taktîkê afernayoxîye beno sembolê Hemleya Şorişgêre ya Bazenê Zagrosî.

Hemrayê ma Şaho Seyîd Sadîqê bajarê Halebçe yê Başûrê Kurdîstanî de yeno dinya û bi kulturê welatperwerîye beno pîl. Badê hêrişê dewleta tirke yê vera Efrînî hemrayê ma Şaho zî sey xeylêk ciwananê kurdan qerarê tewrbîyayîşî geno û serrgêra qirkerdişê Halebçe, 16ê adara 2018 de tewrê sefanê gerîlayan beno. Hemrayê ma Şaho ke warê Garê de dest pê gerîlatîye keno û akademîya pîsporîye ya leşkerî de perwerde vîneno.  Gama ke artêşa tirke vera Avaşîn, Zap û Metîna hêrişê îşxalî dana destpêkerdene, verê xo danê warê pêkewtişan ke verê îşxalî bîgêro.

Hemrayê Şahîn Silopîya Şirnexî de yeno dinya û keyeyêkê welatperwerî yê eşîrê Sipêrtî de beno pîl. Keyeyê ci nameyê qehremanê girdî yê şarê Kurdî Agîtî nano pa. Hema domanîya xo de raştîya têkoşînî nas keno û wayîrê nasnameyê xo vejîyeno. Seba ke dişmenî ra qesasê şehîdan û şarê xo bîgêro verê xo dano koyanê Kurdîstanî û Botan de dest pê gerîlatîye keno. Mîyanê prosese şerî yê Zapî de gerîlatîye museno. 2018 de dezayê ci hemrayê ma Serdem Pîr( Adem Aytiş) Xakurkê de şehîd beno û no zî hêrsê ey yê vera dişmenî zafêr keno. Sey gerîlayêke pîsporî reyna ravêreno Zapî û  tîya tewrê çalakîyanê serkewteyan beno.

Hemrayê ma Dara qezaya Perwarî yê Sêrtî de yeno dinya û sey ferdêkê eşîrê Xelîla  keyeyêkê welatperwerî de beno pîl. Seba ke bira û dezayê ci tewrê gerîlayan bîyî o zî binê tesîrê înan de maneno û kewno cigêrayîşê azadîye dima. Badê hêrişanê dewleta tirke yê vera kurdan ê ke 2015 de ameyî destpêkerdene hemrayê Dara tewrê sefanê gerîlayan beno. Hemrayê ma Dara mektebê operasyonî de perwerdeyê leşkeri vîeno û 2018 de ravêrano warê Zapî. Têkoşînê Zapî de aktîf ca geno û heme wezîfeyanê xo bi serkewtişî ano ca.’’