Merkezê Îrtîbatî û Çapemenîye yê HPGyî eşkerayîya xo ya 14ê hezîran a 2022yî de vatbi ke dewleta tirke hêrişê îşxalî yo ke 14ê nîsane de vera Başûrê Kurdîstanî da destpêkerdene de heta nika 779 rey çeka kîmyewîye şuxulnaye. Hêrişanê kîmyewîyan dima ra zî dewam kerd.

Rixmo ke derehqê hêrişanê  kîmyewîyan yê dewleta tirke de xeylêk belge û şahîdî est ê warê mîyanneteweteyî ra qet nêrazîbîyayîşêk nêame. Dîmenê ke resayî ANFyî de yeno vînayene ke mewzîya Şehîd Berxwedanî ya Girê Şehîd Şahînî de çekê kîmyewîyî ameyî şuxulnayene.

Dîmenan de gerîlayêko maskeyê gazî kerda pa rêçanê kîmyewîyan ramojneno û vano: ''Çekanê kîmyewîyan şuxulnenê. Boya ci zaf giran a.''

Dima ra bêtelî ra vengêk yeno: ''Ewro vera ma artêşa tirke nê, çekê kîmyewîyî û teknîkê NATOyî şer kenê.''

Gerîlayo ke bale anceno sîtemê radarî yê hêzanê dewleta tirke zî ser vano bombardumanan de çekê kîmyewîyî yenê şuxulnayene û seba ke tesîrê gazanê tunelan de dewam keno ê tunelan de maskeyanê gazî şuxulnenê.

Gerîlayêko bêtelî de qisey  keno ano ziwan ke înan vera hêrişan tedbîrê xo girewtî û vano seba ke îmkanê înan çîn ê tim kincanê xo bibedilnê bitaybetî gerîlayanê cinîyan pêrun gijikê xo qesnayo.

Gerîlayê ko dîmenanê mewzîya Şehîd Berxwedanî ramojneno vano tewr peynî de pîya bi gazê îsotî gazêko kîmyewî yo çeqer ame şuxulnayene û rêçanê ci ramojneno. Gerîla vano gama ke hewa yeno nê gazê ke sey tozî yê reyna benê tewrê hewayî û aktîf benê.  Cayê jeneratorî de zî erdî de tozê çeqerî esenî.