Şubeyê Amedî yê Egitim-Senî bi sernameyê ‘Perwerdeyê bi ziwanê dayîke de ver bi çareserîye: îmkanî, astengîye û pêşnîyazî’ komxebatêke kerde. Vizêr temsîlkaranê dezgehan komxebate de qisey kerd.

Komeleya Cinîyan a Rosa ra Esra Çelîk Ercan îfade kerd ke cinîyî nêeşkenê şaredarîyanê qeyûmî de bi kurdkî qisey bikerê.

Nameyê Weqfa Mezopotamya ser o Cemîl Guneşî vat ke ganî seba ke ziwanê kurdkî bibo ziwanê perwerdeyî xebatî bêrê kerdene.

Nubihare ser o Nesîbe Kayag vat: ‘’Kurdkî hinî tena keyeyan de yeno qiseykerdene. No teluke yo. Ganî ma têkoşînêkê xurtî bikerê, bibê yew û ziwanê xo kuçeyan de vila bikerê.’’

Îdarekarê DFGyî Fexreddîn Kiliçî armancanê ronîyayîşê ajansê Welatî ser o qisey kerd.

MED-DERî ser o mamosta Musa Şanakî vat: ‘’Verê ma de 15ê Gulane Roşanê Ziwanê Dayîke est o. Ganî ma nêweşîya xo bizanê û çareser bikerê. Ganî her kuçe de ma seba ziwanê xo têkoşîn bikerê.’’

Hemserekê PENê Kurdan Omer Fîdanî vat ke ê do 15ê Gulane ra verî derheqê perwerdeyê bi ziwanê dayîke de konferansêkî bikerê.

Endamê ÎHDyî Yakup Guneşî bi kirdkî qisey kerd, bale ante meseleyanê kirdkî ser û vat: ‘’Embazê ma vanê ke kirdkî ha çin bena la goreyê ney tênêgêrenê.’’

Serekê Komeleya Kultur û Hunerî ya Dîcle Celal Ekînî vat ke ganî her kes domananê xo bişawo dezgehanê kultur û hunerî.

Qiseykerdişan ra dima netîcenameyê komxebate ame eşkerakerdene.