Merkezê Îrtîbatî û Çapemenîye yê HPGyî bi eşkerayîyêke nasnameyê 4 gerîlayanê şehîdan eşkera kerdî.

Eşkerayîye wina ya:

''Xoverdayîşo destanwarî yê gerîlayanê azadîye Vakurê Kurdîstanî de vera kolonyalîzm û qirkerdişî bêmabên dewam keno. Rixmê pêro xîretanê dişmenî zî embazê ma kulturê xoverdayîşî yê Apogîrî ra tawîz nêdanê û seba rojanê azadan ê şarê ma bedelan danê. Embazê ma her hela têkoşînî bi manayêka pîle ciwîyenê û seba na cuya manadare bedelê şehadetî zî danê. Embazanê ma Berçeme, Jînda, Senan û Tolhildanî pê bawer kerd ke embazê înan do qesasê înan bigêrê, bi nê hewayî ê ver bi şehadetî şîyî. Nê embazê ma pêro cuya xo ya têkoşînî de bîyî mîmarê cuya manadare, înan taybetmendîyê tewr rindî yê merdimîye kesayetê xo de mojnayî ra.

Nasnameyê embazanê ma yê şehîdan wina yê:

Embaze Berçeme Sêrt de dadîya xo ra bena. Embaze Berçeme seba ke qirkerdişanê dewleta tirke ra hesab bipersa 2015 de tewra gerîlayan  bena. a tim xîret kena ke biba şerwanêka azadîye û seba ney azadîya Rayberîye xo rê kena hedefê esasî. A dima ke tewra gerîlayan bena wextêkê dergî xebatanê ciwanan de ca gêna. A 2018 de reyna agêrena koyan û perwerdeyan vînena.  Embaze Berçeme kena ke vera hêrişanê dişmenî cewabê tewr pîlî bida coka derbazê Warê Serhedî yê Vakurî bena.  A Serhed de pê tempo û terzê xo yê xebare embazanê xo rê bena mîsal û tim mîyanê xîretan de bena. Qesasê aye sey embazanê aye ma rê sebebê berzkerdişê têkoşînî yo.

Embaze Jînda şaristanê Makuyî yê Rojhelatê Kurdîstanî de dadîya xo ra bena. Embaze Jînda bi tesîrê embazîya PKKyî û îdeolojîya azadîya cinîyan a Rayberîye 2018 de tewra gerîlayan bena. Embaze Jînda perwerdeyan ra dima cade tewra têkoşînî bena. A Tendurekî ra heta Gilîdaxî xeylêk waran de gerîlatîye kena û çalakîyan de derbanê giranan dana dişmenî ro. Embaze Jînda sey milîtanêka serkêşe ya YJA-Starî û pê kesayetê xo yê jîhatî tim embazanê xo rê bena mîsal. A seba ke nasnameyê azadî yê cinîyan awan bikera zaf xîret kena û bena wayîra kedêka bêhempa. Şehadetê aye ma rê bîyo fermanê caardişê serfîrazîye.

Embaz Senan Wan de dadîya xo ra beno. O verî xebatanê ciwanan de ca gêno û 2015 de zanîngehî ra pa çar embazanê xo tewrê gerîlayan beno. O Zap de perwerde vîneno û di serran Zap de şerî pratîze keno. O mîyanê têkoşînî de keno ke tim xo aver bero û pêro erk û mesuldarîyanê xo bêkêmasî ano ca. O Zapî ra dima derbazê warê Tendurekî beno. Embaz Senan Tendurek de tewrê xeylêk çalakîyan beno, pê coş û enerjîya xo embazanê xo rê beno çimeyê moralî.

Embaz Tolhildan Colemêrg de dadîya xo ra beno. Embaz Tolhildano ke keyeyêkê dîndarî ra bi, wexto ke seba hafizîye şino şaristananê Tirkîya raştê nîjadperestîye yeno. O cade tewrê xebatanê ciwanan beno û 2015 de şehadetê dezayê xo Andokî û embazê xo Tolhildanî ra dima pa çar merdimanê xo tewrê gerîlayan beno. O wextêkê kilmî de beno fermandar. O keno ke koyan de embazanê xo reyde zanayîşanê xo yê serê kultur û ziwanê kurdkî pare bikero. O Gilîdax de fermandarîye keno û tîya de vera dişmenî serkêşîya çalakîyanê serkewteyan keno. O 5ê tebaxa 2022yî de gerîlayê MKPyî Şafak (Ulaş Alankuş) reyde hêrişê dişmenî de şehîd beno.

Embazanê ma Berçeme, Jînda, Senan, Tolhildan û Şafak seba azadîya şarê xo pêro fedakarîyî kerdî, heta şehadetê xo bêmabên têkoşîn kerd. Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê. Ma do qetî xeyalanê azadîya sibeyan ê şehîdanê xo bîyarê ca.''