Endamê Komîteya Rayberdişî ya PKKyî Duran Kalkanî Medya Haber TVyî rê qisey kerd û Komployê 9ê Teşrîna Verêne, tecrîdê vera Rayberê Şarê Kurdî Abdullah Ocalanî, serewedaritişê Rojhelatê Kurdîstanî û Îranî, şerê Herêmanê Pawitişî yê Medya û çalakîya fedayîye ya Mersînî ercnayî.

Qiseykerdişê Kalkanî ra beşêk wina yo:

''Îmrali de çîyêk nêvurîyayo; teda, îşkence û tecrîd dewam kenê. Qaşo Mehkemeya Heqanê Merdiman a Ewropa (MHME) seba caardişê heqê hêvîye wext dabi Tirkîya. La Tirkîya cewabêk zî nêda MHME û Konseya Ewropa. A raşte ne dewleta tirke ne zî Komîteya Wezîran a Konseya Ewropa goreyê qanûnan û krîteran tênêgêrenê. Ê sîstemê rehîneyan anê ca. Konseya Ewropa û MHME zî bi hawayêkê polîtîkî, goreyê menfaetanê xo têgêrenê. Yanî huqûq binê sîyasetî de yo. MHME madem birêka winasêne girewte wa teda bikera ke bira ci bêra caardene. Hende avûkatan û roşnvîran seba şîyayîşê Îmraliyî muracat kerd la dewleta tirke goş nêdana kesêkî û verê pêvînayîşan gêna. Ganî têkoşîno huqûqî bêro zêdînayene. Embazê avûkatî zî ganî xîretanê xo bizêdînê. Sîstemê Îmraliyî têna kurdan yan zî Rayber Apoyî nê pêro dinya eleqedar keno. Coka têkoşînê vera tecrîdî têkoşînê her kesî yo û ganî no têkoşîn bêro vilakerdene. Ganî Hemleya Wextê Azadîye bêra xurtkerdene û çalakîyê seba azadîya Rayber Apoyî bêrê zêdînayene.

Ma hê dekewenê serra 25. ya Komployê 9ê Teşrîna Verêne. Nê komployî armanc kerdêne ke şexsê Rayber Apoyî de kurdan û têgêrayîşê ma biqedîno. Nê 24 serran de vera Komployî bi şîarê 'Şima nêeşkenê tîja ma tarî bikerê' çalakîyê fedayîyî ameyî kerdene û têkoşînêko bêhempa ame kerdene. Bi nê hawayî Komplo ser nêkewt. Komplo planê îmhakerdişê Rayberîye bi û Îsraîl, Amerîka û Îngilîstan zî mîyanê nê komployî de bîyî. Rayber Apo seba ke çareserîya demokratîke ya meseleya kurdan bimojna şibi Ewropa la Ewropa o sînorî ra teber kerd. Dima Kenya de Rayber Apo dewleta tirke rê ame dayene. Sere de Amerîka ê dewletê ke mîyanê komployî de ca girewt kurdan rê neheqîye kerd û ganî hesabê ney bidê. Tecrîdê Îmraliyî mojneno ke komplo dewam keno. Kurdan û têgêrayîşê azadîye Komplo pûç kerd, verê îmha girewt. Ewro fikrê Rayber Apoyî pêro dinya de vila benê û îdeolojîya ey çar parçeyanê Kurdîstanî de yo.

Ez şexsê Jîna Emînî de pêro cinîyan ê şehîdan yad kena. No serewedaritiş sloganê 'Jin, Jiyan, Azadî' keno raştikên û vila keno. Rojhelatê Kurdîstanî de waştişê azadîye zaf pîl û xurt o. Ma eşkenê vajê ke Îran û Rojhelat de Şorişê Cinîyan ho qewimîyeno. Rejîmê Îranî çi biqewimîyo pabesteno hêzanê teberî, vano ajanê Amerîka ûsn kenê. Rejîmê Îranî xeletîye keno. Ganî rejîmê Îranî çalakîkeran de têkilîye virazo, waştişê şar û cinîyan goşdarî bikero. Ma nêwazenê Îran de meseleyî pê şîdet, pêkewtiş û şerî çareser bibê. Waştişê cinîyanê Rojhelat û Îranî meşrû û heq ê. Çalakîyê înan zî meşrû yê. Ganî nê cinîyî rêxistinîya xo xurtêr bikerê û çalakîyanê xo mende bikerê. Serkêşîya cinîyan ewro pêro dinya de aver şina ke no zî xêrê têkoşînê PAJK û Rayber Apoyî ra bi. Cinîyî hê qîrenî çunke heqdar ê. Ez ê cinîyanê ke gijikê xo kenê alaya azadîye selam kena. Seserra 21. do biba seserra cinîyan.Serkêşîya ney zî cinîyê kurdî do bikerê. Îran de hînî vurîyayîşî do dest pêbikerê û rejîm do nêbo sey verî. Ma pê bawer ê ke cinîyî nê xoverdayîşî de do ser bikewê.

Zap, Avaşîn û Metîna de hêrişê barbarî est ê. Dişmen wazeno pê çekanê kîmyewîyan û bomabayanê nukleran ê taktîkî gerîlayan û pêro kurdan îmha bikero. No prosesêko krîtîk o. No şer do qederê her çî eşkera bikero. Dişmen Zap, Metîna û Avaşîn de her roje sûcê şerî keno. La çew vera nê sûcanê belgekerdeyan vengê xo nêvejeno. Dewleta tirke çekanê NATOyî xebitnena û bi nê hawayî NATO beno hemkarê sûcanê dewleta tirke. Ganî her kes tewrê nê têkoşînî bibo, xoverdayîşî pîl bikero. Ganî her kes paştî bido gerîlayan. Beno ke merkezê şerî Herêmê Pawitişî yê Medya yê la şer her ca ra vila beno. Wa çew nêvajo ke nêeşkeno çîyêk bikero. Destê kamî ra çi yeno wa bikero. Ez zî sey vengdayîşê Qerargehê ma fikirîyena û wina veng dana ke wa her kes hîna zaf mesuldarî bigêro xo milî, rêxistinîya xo xurtêr bikero, tewrê têkoşînî bibo û rejîmê AKP-MHPyî birijno.

Çalakîya fedayîye ya Mersînî ganî hol bêra famkerdene. Oyo girîng eşkerayîyê HPG-BÎMî yê. Dewleta tirke vera vana 'ma nînan ra çew nêverda kontrol ma de yo' la na çalakîye dewlete binî ra lerznaye. Têkoşînê kurdan de xeta Zîlane est a ke xeta serkewtiş a, xeta pawitişê azadîya Rayberîye ya. Çalakîya Zîlane ya 30ê hezîrana 1996î vera Komployî xetêka têkoşînî daye destpêkerdene. Çalakîya Mersînî sey çemberê peyênî yê pawitişê Rayber Apoyî ê vera Komployî vejîyaye werte. Ez embaze Sara û Rûkene ke na çalakîye kerde, bi minet û heskerdişî yad kena. Înan Zîlanwarî şer kerd û ser kewtî. Înan serra 25. de cewabêko pîl da Komployî û xeta têkoşînî dîyar kerde. Rayber Apoyî vatbi 'Zîlane fermandar a, ma zî binê fermanê ci de yê.' Embaze Sara û Rûkene fermandarê ma yê, ma şerwanê înan ê. Nê embazê ma ruhê azadî temsîl kenê. Erdogano ke nê embazan rê vano terorîst, terorîsto tewr pîl o. Nika pêro ciwan û cinîyê kurdî do xeta Rûkene û Sara de têkoşîn bikerê. Kurdî do hesabê zulmî pers bikerê. Ma rê xeta esase na xet a. Ma do heta peynî serê xeta embaze Rûkene û Sara de şorê û qetî ser bikewê.''