Hemserekîya Konseya Rayberdişî ya KCKyî serrgêra Qirkerdişê Roboskî de bi eşkerayîyêke qurbanê qirkerdişî yad kerdî. Eşkerayîye wina ya:

''10 serrî verî teyarayanê şerî yê dewleta tirke 33 ciwan û domanê Roboskî bo bombardumanêkê giranî qetil kerdî. Ma nê ewladanê şarê kurdî yad kenê, sozê xo dibare kenê ke seba vîrameyîşê înan Kurdîstanê Azadî awan bikerê ke hînî koy, çem, deşte û dewê Kurdîstanî nêrê bombakerdene.

10 serrî yo mesuldarê nê qirkerdişî nênê dîyene û cezakerdene. No çi nîşaneya nêzdîbîyayîşê dewlete yê bi kurdan a. Ferasetê dewleta tirke wina yo; kurdî eşkenê qir bibê, her ca de kurdan rê zulm eşkeno bêro kerdene, cinîyan ê kurdan rê tecawuz eşkeno bêro kerdene, her çi vera kurdan eşkeno bêro kerdene! Derheqê sûcanê vera kurdan de polîtîkaya bêcezaverdayîşî yena caardene. Eleqeyê na hişmendîye û polîtîka bi polîtîkaya qirkerdişê kurdan esta. Ê wazenê ke bi nê hawayî kurdan bixeniqê û têkoşînê azadîye ra dûrî bivisnê. Şarê kurdî rê yeno vatene ke 'Heta ke şima verê kurdan de çok nêşorê erdî ro çîyê winasênî do bêrê sereyê şima.'

Teyarayanê ke 33 roniştoxê Roboskî dabî bombayan ver cayêkî ra ferman girewt. Sûcdarê tewr pîlî zî ê yê ke no ferman dayo. No ferman raşta raşte hetê Erdoganî ra ameyo dayene. Erdoganî rê ameyo perskerdene ke 'Konvoyêkê qeçaxçîyan esto ke tede terorîstî estê. Ma bidê înan ro?' Erdoganî zî vato 'bidê piro.' Coka sûcdarê Qirkerdişê Roboskî nênê muhakemekerdene. Xîret yeno kerdene ke qirkerdişê 33 kesan sey zîyanêkê şerî bêro mojnayene û bidîyo vîrakerdene. Bi nê hawayî Erdogan pê destanê xo yê gonîyan rehet gêreno. Bêguman Erdogan qirkerdişê bi hezaran merdiman ra mesuldar o. Wextê xoverdayîşê xoîdarekerdişî de zî Erdoganî bi xo seba rijnayîşê şaristananê kurdan ferman dayo.

Dewleta trike dişmena kurdan a ke qirkerdişan mehkeme nêkena la înanê ke Qirkerdişê Roboskî şermezar kerdî tepişena û muhakeme kena. Tarîx de dewleta tirke tim wina nêzdîyê qirkerdişanê vera kurdan bi. Êyê ke Dêrsim, Zîlane de qirkerdiş kerd nêameyî cezakerdene, êyê ke fermanê qirkerdişan dayê nêameyî mehkumkerdene la êyê ke qirkerdişî ardî ziwan ameyî sûcdarkerdene, muhakemekerdene û tepiştene.

Roboskî zî sey Qirkerdişê Dêrsimî û Zîlane qirkerdişo winasên o ke raştîya dewleta tirke vete çiman ver. Dîmenê cenazayanê ke pê astoran kirişîyayî qetî do vîrê merdiman ra nêşorê û ê do nêeşkê nê qirkerdişî bidê vîrakerdene. Mesuldarê nê qirkerdişî qetî do bêrê cezakerdene. Şarê kurdî zî, hêzê demokrasî zî ganî xoverdayîşê rûmetênî yê şarê Roboskî het de bibê, têkoşînê înan xurt bikerê û kiştoxan vejê verê mehkemeyanê şarî.

Dadîyê keyeyanê şehîdan 10 serrî yo têkoşînêkê mîsalî anê ca. Ganî şarê ma û hêzê demokrasî paştî bidê nê têkoşînê dadîyanê şehîdan. Dewaya înan dewaya şarê kurdî û hêzanê demokrasî ya. Heta ke kiştox û mesuldarê Qirkerdişê Roboskî nêrê muhakemekerdene Kurdîstan azad nêbeno, Tirkîya zî demokratîk nêbena. Sere de muhakemekerdişê sûcdaranê pêro qirkerdişan bi taybetî ê Qirkerdişê Roboskî parçeyêko bingeyî yê têkoşînê azadî û demokrasî yo. Coka ganî heta ke sûcdarî bêrê muhakemekerdene no têkoşîn bêmabên bêro dewamkerdene.''