Hemserekîya Konseya Rayberdişî ya KCKyî bi eşkerayîyêke Serekkomaro newe yê Iraqî Dr. Abdullatîf Reşîd fîraz kerd. Eşkerayîye wina ya:

''Ma Dr. Abdullatîf Reşîdî serrî ra fîraz kenê û wezîfeyê ci de ci rê serkewtiş wazenê. Ma pê bawer ê ke Birêz Reşîd do çareserkerdişê meseleyanê şarê Iraqî û şarê kurdî rê ardimêkê pîlî bikero. Birêz Reşîd kesêko winayên o ke azadîya şarê kurdî rê xizmetê pîlî kerdê û şarê kurdî tira zaf hes keno û hûrmetê ci keno. Sey serekkomar weçînayîşê ci mojneno ke o bîyo mazharê heskerdiş û hûrmetê şarê Iraqî zî. Ma pare kenê ke sey têgêrayîşê azadîye yê kurdan tim do destek bidê ci.

Serekkomaro verên ê Iraqî Mam Celal Talabanîyo rehmetî bi. Ey seba çareserîya meseleya kurdan xîretêko pîl dabi û xizmetê pîlî dabî Iraqî. Dr. Abdullatîf Reşîdo ke dostê Talabanîyî bi, do sey ey seba çareserîya meseleya kurdan û meseleyanê Iraqî xîret bikero. Şarê kurdî prosesêkê tarîxî ra derbaz beno. Nê prosesî de şarê ma destkewteyê tarîxîy vistî destî û resa a safha ke eşkeno şaranê Rojhelatê Mîyanênî reyde yewîya xo bîyaro ca. Şarê kurdî hînî wazeno no têkoşînê ci ser bikewo. Ma pê bawer ê ke Dr. Abdullatîf Reşîd do cewab bido nê waştişê şarê kurdî û dewaya azadîye ya şarê kurdî rê ardimêkê pîlî bido.

Şarê Iraq û herême zî wazenê meseleyî çareser bibê. Hêzê îşxalker û kolonyalîstî seba ke Iraq û Rojhelatê Mîyanênî de serdestîya xo ronê, rantê sîyasî û ekonomîkî bivisnê destî mezhebperestî û nîjadperestîye vila kenê û meseleyan bi nê hawayî xorin kenê. Meseleyê Iraq û Rojhelatê Mîyanênî ancax pê demokratîkbîyayîşî eşkenê çareser bibê.

Dewleta tirke ya kolonyalîste seba ke têgêrayîşê azadîye tasfîye bikera û kurdan qir bikera her ca de hêrişan kena. Coka dewleta tirke hêrişê Başûrî kena û wazena xo biresna hedefanê Mîsak-i Mîllî. Dewleta tirke xîret kena ke îşxalê xo yê vera Başûrî hîra bikera. Ma sey têkoşînê azadîye yê kurdan ganî dewaya şarê Kurdîstanî bipawê û azadîya kurdan bîyarê ca, vera îşxalî têkoşîn bikerê. Ma û şarê kurdî Serekkomarê Iraqî ra pawenê ke îşxalê dewleta tirke biqedîno, vera sîyasetê Neo-Osmanîyan tewirêk bigêro û verê ney de vindero.

Ma reyna Dr. Abdullatîf Reşîdî fîraz kenê. Ma pê bawer ê ke no wezîfe do seba şarê Kurdîstan, Iraq û herêma ma xêrîn bibo, seba çareserîya meseleyanê şarê kurdî û herême bibo wesîle.''