Dewleta tirke ya îşxalkere bînşewe Şingal, Mexmûr û Rojawan dabî bombayan ver. Netîceya hêrişan de Mexmûr de 2 endamê Hêzanê Xopawitişî, Şingal de 3 sivîlî û Rojawan de zî 4 sivîlî şehîd bîyî.

Têgêrayîşê Azadîye yê Cinîyan ê Êzidîyan (TAJÊ) ra Dayê Şemê û mamostayê kurdkî Nayîf Şengalîyî derheqê babete de ANFyî rê qisey kerd.

Dayîke Şemê îfade kerd ke nê hêrişî netîceya polîtîkayanê Erdogan, PDK û Kazimîyî de ameyî kerdene û vist vîrî ke bombardumanî ra çend rojî verî PDK û Kazimî dewleta tirke reyde ameyî têhet.

Dayîke Şemê vat: ''Çira ê destûr danê nê hêrişan? Kazimî wexto ke sînorê Şingalî zîyaret kerdbî fermandarê ma Seîd Hesen şehîd bibi. Kazimî çira wayîrê rûmetê Iraqî nêvejîyeno? YBŞ û YJŞ hêzê meşrû yê. Înan DAÎŞ bin kerd. Erdoganî cergê DAÎŞî verdayî Hesekê ser. Seba ke DAÎŞ Hesekê de bin kewt Erdoganî hêrişê ma kerd. Hukmatê Iraqî çira wareyê hewayî nêqefilneno? Eke Kazimî bêvengîya xo rê dewam bikero hînî serekwezîr nêbeno. Ma do heta peynî xoverdayîşê xo rê dewam bikerê û do ser bikewê. Ma do rayîr medê fermanan.''

Mamosteyê kurdkî Nayîf Şengalîyî zî vera bêvengîya hukmatê Iraqî nêrazîbîyayîşê xo mojna û vat: ''Nê hêrişan de hedef têna Şingal nîyo. Hêriş vera serdestîya erdê Iraqî yo. Nê hêrişan ra dima ma reyna dî ke hukmatê Iraqî nêeşkeno komelê êzidîyan bipawo. 2014 de zî înan ma destê DAÎŞî re verdabî. Ez venga pêro êzidîyan dana ke wa vera nê hêrişan tewirê xo bimojnê û paştî bidê hêzanê xo.''