27ê kanûna 2021î de hêzanê Iraqî nişka ra waşt ke bikewê Kampa Multecîyan a Şehîd Rûstem Cûdîyî (Mexmûr) û dormeyê kampe pê têlan bigêrê. Naye ser o şarê kampe vera hêzan nêrazîbîyayîşê xoo mojna û xoverdayîşê şarî ra dima hêzanê Iraqî xo apey ant. Reyna Iraqî îdareyê Mexmûrî rê vatbi ke ê do dormeyê kampe pê têlan bigêrê. Vera kampe tehluke dewam keno.

Cinîyanê Kampa Mexmûrî derheqê babete de ANFyî rê qisey kerd.

Vervatoxa Komîteya Keyeyanê Şehîdan Sultane Yildiztane ard ziwan ke Kampa Mexmûrî kampa multecîyan a û vat: ''Dewleta tirke bi destekê dewleta Iraqî û PDKyî hêrişê ma kena. Kampe de 11 hezar merdimî ciwîyenê. Hêrişan reyde çend mengî verî Iraqî waşt ke dormeyê kampe pê têlan bigêro. Kampa ma kampêka sîyasî û no zî hetê Neteweyanê Yewbîyayeyan û hukmatê Iraqî ra ameyo qebulkerdene. Çend mengî verî hêzê Iraqî nişka ra ameyî ke dormeyî pê têlan bigêrê la şar werişt payan ser û înan apey game eşte. Nika reyna wazenê dormeyê ma bigêrê. Ma do qetî ney qebul nêkerê. Ma rojêke zî zerar nêda hukmatanê Iraq û Herêma Kurdîstanî. Çira ê wina tedaya ma kenê? Ma bedelî zî bidê, se beno wa bibo ma do nêverdê ke ê dormeyê ma bigêrê. Ez venga NY û hukmatê Iraqî dana ke wa hûrmet bimojnê kampa ma.''

Kerîme Kanat zî îfade kerd ke ê sey cinîyan do rayîr nêdê ke dormeyê kampe pê têlan bigêrîyo û vat: ''Eke dormeyê ma pê têlan bêro girewtene kampe do biba zîndanêkê akerdeyî. Seba astengkerdişê ney çi hewce yo ma do bikerê. Eke ma zulm qebul bikerdêne ma nêameyêne tîya. Ma koletîye û bindestîye qebul nêkenê. Dewleta Iraqî na bire waştişê dewleta tirke ser o girewta.''