Newroza Amedî ya ke sey şayîya fînalî ya Vakurê Kurdîstanî yena kerdene bi coşê girdî yena pîrozkerdene. Şarê Amedî bi şîarê ''Her der Newroz, her dem azadî'' û ''Bi adirê Newroze ver bi azadîye'' Parka Newroze ya qezaya Rêzanî de ame têhet.

Asayîşê Polîsan ê Dîyarbakirî ke Newroza parî de cehd kerd ke provokasyon vejo  mabênê meydanê Newroze û sehneyî de têlê  panc metreyan ca kerd. Ciwanî pê pankartanê xo vejîyî têlî ser û Asayîşê Polîsan ê Dîyarbakirî şermezar kerd. Polîsan kerd ke hêrişê ciwanan bikerê la nêrasayê înan.

Keyeyê Şanyaşran ra Ferît Şenyaşar, cinîya Selahattîn Demirtaşî, Başake Demîrtaş û cinîya Selçuk Mirzrakliyî, Zeynepe Mizrakli sey memananê taybetan ê Newroze tewrê şayîye bîyî. Reyna îdarekaranê partîyan û dezgehanê kurdan û hetanê demokratîkan zî protokol de cayê xo girewt.

Sereka Komîteya Amadekerdişî Hemsereka HDPyî ya Amedî Gulîstane Atasoy kirmanckî û kirdaskî şar silam kerd û vat hemrayê Denîze Poyraze û Nagîhan Akarsel Newroza şima pîroz bo.

Ciwananê posterê Rayberê Şarê Kurdî Abdullah Ocalanî akerdî û bi sloganan“Bijî Serok Apo” rayra şîyî. Şarî zî bi tîlîlî û sloganan paştî daye ciwanan.

 Sîysetmedarê kurdî Ahmet Turkê ke tîya qisey kerd vat: ''Na Newroze dewrê azadbîyayîşê Birêz Abdullah Ocalanî ya. Dewrê şarê kurdî yo ke do qederê xo tayîn bikero.''

Vervatoxa Partîya Çep a Hewze Çîgdeme Kiliçgun Uçar  zî vat Deklerasyonê Newroze yê Rayberê Şarê Kurdî Abdullah Ocalanî hema vîyarbar o û bale ante hêrsê şarî yê şer û tecrîdî. Uçare vat: ''Şarê ma do 14ê gulane de nê îqtîdarî ra hesab biperso û ey bişawo. Rayîrê hîrêyinî do bibo rayîrê sîyasetî.''

Hemserekê Pêroyî yê KCDyî Berdan Ozturkî vat: ''Rayîrê Demokrasîyî Amedî ra ravîyareno. Tîya zerrîya kurdan o. Amed meydanê demokrasî yo. Şarê ma tecrîdê serê Birêz Ocalanî qebul nêkeno û azadîya wazeno.''

Hemserekê Pêroyî yê HDPyî Mîthat Sancarî vat: ''Semedê haştîye gerek tecrîdê Îmraliyî cade bêro wedartene. Ma do nê îqtîdarî bişawê û nê sîstemî bibedilnê.''