Ceylane Onkol hema ke 12 serre bîye 28ê êlula 2009î de deweka Xanbazî ya dewa Kanîsipî ya qezaya Licê ya Amedî de wexto ke pesê xo çarnayêne pê hewano ke qereqolî ra erzîya amebî qetilkerdene.

Cenazaya aye 6 saetan erd de mende. Dadîya aye parçeyê meyîtê ci pêşê xo de arê dayî, dewijan cenazaya ci pê pelanê mazêrî pîşt tê. Dozger 3 rojan ra dima şi cayê serebûtî û pêro delîlê ke ameybî reşkerdene dayî Serdozgerîya Komare ya Licê. Dewlete îdîa kerd ke Ceylane pê wiştere kişîyaya. Raporê mergî de keye sey sûcdarî ame dîyene.

Keyeyê Onkolî û avûkatî bira nimite ra nêeşkayî xo biresnê dosya. Dima 2010 de keyeyî muracatê Mehkemeya Heqanê Merdiman a Ewropa (MHME) kerd. Keyeyî gulana 2012yî de reyna muracatê MHME kerd. MHME 2017 de bire daye ke dewa de 'binpaykerdişêk çin o.' Têkoşînê keyeyî ra dima Mehkemeya Îdarî 2021 de qssê 238 hezar lîra tazmînat da keyeyî. La kesêk zî nêame muhakemekerdene û cezakerdene.

Çimê Ceylane 13 serrî yo gêrenê edaletî.

Dadîya Ceylane Salîha Onkol Ajansê Mezopotamya rê qisey kerd û pare kerd ke heta ke kiştoxê Ceylane ceza bigêrê têkoşînê aye tim do dewam bikero.   

Dayîke Salîha Onkol da zanayene ke roja qetilkerdişî de aye waşta ke wa Ceylane şora dibistane la aye nêwaşte û şîye ke pesî biçêrna. Dayîke Salîha vat: '' Aye mi ra waşt ke ez ci rê meqarne pewja û dima şîye hetê pesî. Dima vengê hewanî ame. Mi hîs kerd ke bomba kewta kişta Ceylane. Cîranan zî vat ke bomba mîyanê pesê ma de kewta war. Ez û lajê mi ma pê vazdayîzî şîyî. Verî lajê mi û dî ke bize ra gonîye yena wat. Dima ma Ceylane dîye. Wexto ke mi Ceylane ê halî de dîye ez xo ra şîya. Cigerê aye parçe parçe bi, erd de bi. Mi cigerê ci erdî ra girewt, kerd sineyê xo.

6 saetî cenazaya keyeyê mi erd de mende. Ambulans, dozger, leşker û polîsî nêameyî. Dozger ame Qereqolê Abaliyî. Vato 'tîya herêma terorî ya', asayîşê ganê ci çin o coka nêameyo. Ma Ceylane berde qereqolî. Otosî ame kerdene. Otopsî de înan vat a ya mayînî ra yan zî pê wiştere kişîyaya. Ma heta şanî uca de mendî.

Eke Ceylana mi weş bîyêne nika 27 serre biyêne. Ceylane domana min a tewr qije bîye. Embazê aye pêro zewijîyayî, bîyî wiharê domanan. Ez key biewna înan Ceylana xo vînena.

Ez kişîyayîşê aye ra 3 rojan dima şîya Lciê, hetê dozgerî. Înan mi ra pers kerd ke kamî Ceylane kişto. Mi zî vat ê hîna hol zanenê ke kamî kişto. Ez seba Ceylane şîya heta Anqara û Îstanbulî la çewî kiştişê aye ra ceza nêgirewte. No dejê min o tewr pîl o. Ez nêwazena qet yew doman zî bimiro. Wa hînî haştîye bêra, çew nêmiro.

Ez senî keyeyê xo, xo vîr a bikera? Ez do tim bipersa ke kênaya mi kamî, senî kişta. No mi rê derd o. Ez wazena wa nê çîyî eşkera bibê. Ez heta bimira zî têkoşînê kênaya xo rê dewam kena.''

Dayîke Salîha Onkol seba ke faîlî bêrê muhakemekerdene serê gorê kênaya xo de soz da û serê gorî de lorîkî vatî.