Qezaya Sûrî ya Amedî de qedexeyê tebervejîyayîşî ke 2ê kanûne ya 2015 de ame îlankerdene 6 serrî xo dima verdayî. Hêzanê dewleta tirke qeza serûbin kerd. Rixmo ke pêkewitşê 103 rojan adara 2016î qedîyayî qedexeyî heta roja ma hetêkî ra dewam keno. Qezaya Sûrî ya Amedî ya ke lîsteya Mîrasê Kulturî yê Rêxistina Kultur, Zanist û Perwerdeyî yê Neteweyanê Yewbîyayeyan (UNESCO) de ca gêna, şahîdîya qedexeyê tebervejîyayîşî yê tewr dergî kerde. Sûr ewro sey warê rantî yeno şuxulnayene.

Muxtarê taxa Savaşî ya qezaya Sûrê Amedî Lokman Bakirî derheqê babete de qisey kerd. Bakirî ke ard ziwan ke badê rijnayîşê Sûrî heme cîran û merdimê ey hetêkî rê vila bîyî û vat: ''Ma tîya ameyî dinya û pîl bîyî. Yewna dinya ma nas kenêkenê. Tîya keyeyê mi estbî la dewlte o rijna. TOKÎ ra keyeyêko kişkêk da mi la o keye nufusê mi rê nêvejeno. Xora semedê nê keyeyî hendê 50 hezar TLyî zî mi xo rê kerd deyndar. Taxê  Cevatpaşa, Fatihpaşa, Dabanoglu, Hasirli, Cemal Yıimaz û Savaşî pê tankan topan rijnayî û şarê ci barkerdişî rê mecbur verda. Kenê ke her hetî ra zerrîya Sûrî veng bikerê û ercanê ci çîn bikerê. Şarê Sûrî keyeyanê ci ra vet, fîna kuçeyan û kerd feqîr. Ez ewro katê 7. de nişena ro û qet yew cîranê xo nas nêkena. Ez pê razî ya ke Sûr de xeyme de biciwîye la ez cuya Dicleketî ra razî nîya. Kuçeyê ke ma tede bîyî pîl ma ewro nas nêkenê. Nê keye ne zî kuçeyî mendî. Banê ma rijnayî herinda ci banê ke viraştî yew mîlyonî ra roşenê. Şaro ke wazeno agêro taxanê xo ganî senî bieşko nê pereyî bido?''