Komîteya Rayberdişî ya PKKyî bi wesîleya serrgêra Komployê Mîyanneteweyî yê 15ê Sibate yê vera Rayberê Şarê Kurdî Abdullah Ocalanî eşkerayîya nuştekîye daye û nê pare kerdî:

''Ma sey şarê kurdî û Têgêrayîşê Azadîye yê Kurdîstanî bi şîarê 'Şima nêeşkenê tîja ma tarî bikerê' 23 serrî yo vera komployî bi hewayêkê qehremankî têkoşîn kenê. Heta nika ma pêro hêrişê komployî pûç vetî. Ewro ra tepîya ganî ma komployî bi temamî bin bifînê. Na çarçewe de ma verî komployo ke verê merdimîye yo lanet kenê û têkoşînê Rayber Apoyî yê vera hêrişanê komplokaran selam kenê. Ma şehîdanê xo yê qehremanan yê ke bedenê xo dormeyê Rayber Apoyî de kerd pêrcînê adirî, bi hurmet yad kenê û soz danê ke ma do rêçê înan de xûrtêr têkoşîn bikerê.

Seba ke komployê mîyanneteweyî serkêşîya Rayber Apoyî de bi têkoşînê têgêrayîş û şarê ma pûç ame vetene metodê bînî fînîyayî dewre. Pê xeta tasfîyekare ame waştene ke PKK mîyanê xo de bêro letekerdene û Rayber Apo bê rêxistine bimano. Reyna bi kayan û xîleyanê cîya cîyayan sey 'pêvînayîşê Îmraliyî' ame waştene ke komplo ser bikewo. La heme nê planê hêrişî ameyî pûç vetene. Coka nika pê tecrîd û îşkenceyî wazenê qesas bigêrê. PKKyî sey 'rêxistina terorî' name kenê û vera kurdan zext û qirkerdişî dewam kenê. Nê pêroyî pabesteyê komployê mîyanneteweyî yê.

Komployê mîyanneteweyî yo ke şexsê Rayber Apoyî de vera estbîyayîş û azadîya kurdan ame kerdene hetê îdareyê Amerîka ra ame plankerdene û rayraberdene. Komployo ke 24 serrî yo yeno rayraberdene sere de Amerîka, Îsraîl û Îngîlîstan welatanê sey Fransa, Almanya, Rusya, Yunanîstan û Kenya ra paştî geno. Zelel yeno vînayene ke bi qirkerdişê kurdan serkewtişê komployî yeno waştene. Na çarçewe de hêrişo hempar ê sîstemê îqtîdar û dewlete yê unîversalî yeno kerdene. No hêrişo unîversalo ke Tirkîya sey gardîyanî şuxulneno, sîstemê tecrîd û îşkenceyî yê Îmraliyî payra tepişeno. Ma sey têgêrayîş, şar û dostanê kurdan ganî nê raştîyan zaf rind bivînî û çirey xo vîra mekerê.  Ganî vera komplokaran ma têkoşînî wina zanaye aver berê û komplokaran ra hesab bipersê. Ewro Îmrali de hêrişo unîversal yeno kerdene. Ganî vera nê hêrişî têkoşîno unîversal bêro xurtkerdene.''