Amed de seba protestokerdişê Komployê 9ê Teşrîna Verêne yê vera Rayberê Şarê Kurdî  Ocalanî bi sloganê 'Ma ver bi azadîye şinê' rayraşîyayîş do bêro kerdene.  Venga şarî dîya ke wa tewrê rayraşîyayîşî bibo.

Têgêrayîşê Cinîyan ê Azadan (TJA), Partîya Herêmanê Demokratîkan (DBP), Meclîsê Cinîyan ê HDPyî, MEBYA-DER, TUAY-DER, Xîretê 78an, Komeleya Huqûqnasan a Seba Azadîye (OHD) derheqê Komployê Mîyanneteweyî yê vera Rayberê Şarê Kurdî û tecrîdê Îmraliyî de bînaya HDPyî ya Amedî de eşkerayîye daye.

Eşkerayîye de Hemserekê DBPyî yê Amedî Hayrettîn Altun û Wekîla HDPyî ya Amedî Dêrsime Dag qisey kerd.

Hayrettîn Altunî îfade kerd ke serrgêra Komployî de Rayîrê Emekî yê Rêzanî de bi şîarê 'Ma ver bi azadîye şinê' kom bibê û rayraşîyayîşêk bikerê. Altunî vat: ''Sey her wextî şarê kurdî nika zî wazeno xoverdayîşî aver bero. Eke kurdî wayîrê Ocalanî vejîyê demokrasî do bêra. Ma do saete 15.00 de, roja yewşemeyî serê Rayîrê Emekî de bêrê yewca. Ma venga pêro şarê Amedî danê ke wayîrê demokrasî û kede vejîyo, tewrê rayraşîyayîşî bibo.''

Wekîle Dêrsime Dag zî dîyar kerd ke Komployo Mîyanneteweyî heta nika ser nêkewto û vat: ''Paradîgmaya Ocalanî pêro dinya ra vila beno. Ganî hol bizanîyo ke têkoşînê azadîye yê şarê kurdî pê komplo û tecrîdî qels nêbeno. Sere de cinî û ciwanî ma venga pêro merdiman danê ke tewrê rayraşîyayîşê ma yê seba azadîya Rayber Ocalanî bibê.''

 Eşkerayîye bi sloganan qedîyaye.