Kampa Multecîyan a Şehîd Rûstem Cûdîyî (Mexmûr) de 27 serrî yo perwerdeyê bi kurdkî dîyeno.  Vervatoxa Warê Perwerdeyî yê Kampa Mexmûrî Bêrîvane Kaya derheqê termînê neweyî yê perwerdeyî de ANFyî rê qisey kerd.

Bêrîvane Kaya da zanayene ke 13ê êlule de termîno newe yê perwerdeyî dest pêbîyo û vat: ''Destpêkê termînî ra verî ma seba çareserkerdişê meseleyan komxebatêke kerde û komîsyonêk awan kerd. Ercnayîş û pêşnîyazanê komîsyonî ra dima bingeyê termînê neweyî ronîya. Nika kampe de 3 hezar wendekarî est ê. Kampa ma de 4 dibistana kreşî, 4 dibistanê verêneî, 2 dibistanê mîyanênî û yew lîse est ê. Seba perwerdeyê lîsansî zî unîversîte reyde peymana ma est a. Ma eşkenê vajê ke çar parçeyanê Kurdîstanî de sîstemê perwerdeyî yê Mexmûrî bingeyê perwerdeyê bi ziwanê dayîke awan keno. Çunke 27 serrî yo Mexmûr de perwerde dîyeno. Ma derheqê perwerdeyê bi ziwanê dayîke de heqê pêro zehmetîyan ra ameyî. Emser ma seba dibistana verêne xebatêka taybete kerde. Seba ke bale wendekaran biancê ma dêsî boyax kerdî, xêz kerdî.

Pêro dibistanan de 31 îdarekar û 150 mamostayî estê. Sîstemê ma yê perwerdeyî armanc keno ke goreyê sîstemê demokratîkê neteweyî wendekaran biresno. Ma coka sîstemê xo yê perwerdeyî paradîgmaya Rayber Apoyî ser o naro.''

Bêrîvane Kaya pare kerd ke ablûqaya vera Kampa Mexmûrî tesîrê perwerdeyî zî kena û vat: ''Ma seba meseleyanê madîyan Hukmatê Iraqî de pêvînayîş kerd la waştişê ma nêameyî caardene. Malzemeyê sey kitab, kirtasîye zî nêameyî peydakerdene. Heta hêzanê asayîşî dest na malzemeyanê perwerdeyî ser. Rixmo ke wendekaranê ma îmtîhanê zanîngehan de puanê berzî girewtî unîversîteyan de nêameyî cakerdene. Neheqîyê ke ma rê yenê kerdene werte de yê. No zî parçeyêkê sîyasetê înan o.''