Canbaze: Têkoşînê cinîyan ê Rojawanî hêz dano ma

Wekîla HDPyî Dilşate Canbaz Dêrsim de Komxebata Cinîyan de bale ante têkoşînê cinîyan ê Rojawanî ser û vat: ''Têkoşînê înan hêz dano ma.''

Dêrsim de hetê Yewina Têdûştîye ya Şaredarîya Dêrsimî  Komxebata cinîyan ya hîrê rojan ameye kerdene. Her roje bi tewrbîyayoxanê cîya cîyayan  babetê muhîmî ameyî destgirewtene. Vizêr roja peyên a komxebete de Wekîla HDPyî Dilşate Canbaz bale ante têkoşînê cinîyan ê kurdan ser.

Komxebate de verî Wekîla Partîya Karkeran a Tirkîya Seda Kadigîl qisey kerd û bale ante ser ke Meclîs de cinîyî bi hawayêkê qîmî nênê temsîlkerdene û Meclîs seke 'kulubê camêrdan o.' 

Dima Akademîsyene Sîbele Ozbudun bi persê 'Gulîstane Doku ça de ya?' dest pê qiseykerdişî kerd. Ozbudune îfade kerd ke şewêke bi vateyêkê camêrdêkî Tirkîya Peymana Îstanbulî ra vejîyaye û hişmendîya îqtîdarî cinî û camêrdan têdûşt nêvînena. 

Wekîla HDPyî Dilşate Canbaze hêrişê vera cenazaya sîyasetmedara kurde Aysele Dogan vist vîrî û vat: ''Ê cenazayanê ma ra zî tersenê. Wina aseno ke ma rayîrê raştikênî ser de yê. Pêro dinya de cinîyî weriştî we. La cinîyan ê kurdan ê Rojawanî tewr vernî de têkoşîn kerd. Kobanê de Şingal de înan vera DAÎŞî tewr vernî de şer kerd. Têkoşînê înan hêz dano ma.'' 

Komxebate pê cewab û persan qedîyaye.