Xebatê Îtîfaqê Kede û Azadîye yê semedê vîjnayîşê 14ê gulane dewam kenê. Endamê Meclîsê Partîye yê HDPyî Ozgur Zeydanogluyî prosesê vîjnayîşî erjna.

Ozgur Zeydanogluyî vist vîrî ke HDP tradîsyonê sîyasetê 40 serran ra yeno û vat: ''Sebebê qefilnayîşê partîyanê ma xora yeno zanayene. Sey partîyanê ma yê verênan bi qefilnayîşê HDPyî zî yeno waştene ke komelê kurdan teberê sîyasetî de bimano û verê waştişanê înan ê meşrûyan bêro girewtene. Hem zî polîtîkaya tirkîyabîyayîşî ya HDPyî ra tersenê. Seserra Komare de prosesê înkar û îmha yê vera kurdan dewam keno.''

Zeydanogluyî  vat: ''Şima eşkenê yew partî biqefilnê la eke şaro ke paştî dano na partî cayê xo de paweno, çîyêk destê şima ra nîno. Eslê xo de tedbîrê ke ma bigêrê zî çîn ê. Xora şarêko pabeste bi xo tedbîr o. Şarê ma girêdayeyê partîya xo yo. No şar çend şino zafêr beno. Şarê kurdî do çirey bê partî memano. Têgêrayîşê ma mûsayeyê qefilnayîşê partîyan o. Xora no proses zehmet o la ma mûsaye yê.''

Ozgur Zeydanogluyî bale ante muhîmîya nê vîjnayîşî ser û wina dewam kerd: ''Dewaya qefilnayîşî zor nêdana ma. Nê prosesî de dahîna zaf hîsgêrîye û têkoşîn hewce keno. HDP partîyêka klasîke ya sîstemî nîya. Mesela nê welatî de xeylêk partîyê ke heta îqtîdarî ameyî, peyra çîn bîyî.  HDP bi xeta xo partîya sîyasîye ya 40 serran a û tim rolêkê stratejîkî kay kena. Çunke meseleya kurdan û demokratîkbîyayîş rojdemê xo de tepişena. Ewro HDP aktoro zaf muhîm o. Vera faşîzmê îqtîdarê AKP-MHPyî têkoşîno tewr gird HDPyî da. Rixmê bedalanê girdan peyser game nêeşte. Eke ewro peynîya îqtîdarî bîya nêzdî, no xeyrê HDPyî yo. AKPyî 21 serran de texrîbato gird xo dima verda. Coka no vîjnayîş muhîm o. Ma bi Îtîfaqê Kede û Azadîye amadekarîya xo kenê. Ma sey rayîrê hîrêyinî vejîyenê orte. Îtîfaqê ma mîyanê şarî de heyecan û hêvî afirnayo.''