Paytextê Almanya Berlin de vizêr bi vengdayîşê ''Erdogan Almanya de ewleyîya ganê ma tehdît keno'' verê banê Serekîya Federalî de mîtîng ame kerdene.

Mîtîng de derheqê programê Serekkomarê Tirkîya Recep Tayipp Erdoganî yê Berlinî ke pêra ame betalkerdene, de qiseykerdişî ameyî kerdene û hukmatê almanî ra ame waştene ke  wa tekîlîyanê xo yê leyminan bi dewleta tirke biqedîno. Qiseykerdoxan ard ziwan ke dewleta tirke bi paştdayîşê Almanya kurdan qetil kena û veng da hukmatê almanî ke wa vera kerdişanê dewleta tirke ya qirkere bêveng nêmano.

Eşkerayîye de ame waştene ke wa Almanya de ocaxê osmanîyan bêrê qefilnayene, endamê MÎTî bêrê tebersînorkerdene û înanê ke sûc kerdî bêrê tepiştene, DÎTÎB bêro qefilnayene, wa dekewtişê Mustafa Açikgoz û Metin Kulunkî yê Almanya bêro qedexekerdene, wa ewleyîya muxalîfan û kurdan ê ke terorê rejîmê Erdoganî ra remayî, ameyî Almanya, bîgêrîyo binê garantî.