Hemsereka Konseya Rayberişî ya KCKyî Besê Hozat programêkê taybetî yê telvîzyonê Medya Haberî de rojdem erjna. Qiseykerdişê Hozate ra tay nuqtayê muhîmî wina yê:

''Semedê kurdan manayê Newroze cîya yo. Tay şarî sey ameyîşê wisarî Newroze pîroz kenê la kurdan de Newroze têna ameyîşê wisarî nê, vera zilmî serewedaritiş o. Newroze kurdan de xoverdayîşê azadîye yo. PKKyî ra nata zî pances serrî yo manayê ci çend şino xorî beno. Newroza esmer zî bi mesajanê sîyasîyî ameye pîrozkerdene. Pêro Newozê ma xora wina yê. Na Newroze mesajê ma do Rayber Apoyî azad bikerê û  îqtîdarê AKP-MHPyî birijnê vejîya vernî. Newroza Amedî de waştişê her kesî azadîya fîzîkîye ya Rayber Apoyî bî. 

Hetê bînî ra şarê ma tewirê xo yê yewîya neteweyî mojna ra. Hetê ke yewîya ra dûrî vindenê semedê yewîya neteweyî ameyî dawetkerdene. Xeylêk partîyan kurdan û hetanê dostan mesajê muhîmî dayî. Serekê YNKyî Bafil Talabanî zî mesajêko bimana da. Semedê yewîya demokratîkî gerek ewro ra tepîya xebatê hêzdar bêrê kerdene. Ma do semedê caardişê waştişê şarê xo çîyo ke destê ma ra yeno bikerê. Xora waştişê Rayberîya ma tim no bi. Ma na babete de xebatê muhîmî kerdî la rîyê tewirê PDKyî ra nêbi. La şarê ma na Newroze de mojna ke PDK çînêbo zî yewîya neteweyî bena.  Xora nika PKD rolo bêxêr kay keno. Pîya bi dewleta tirke ya îşxlakere têgêreno. Cayê înan eşkera yo. Teberê ey de kurdî eşkenê yewîya neteweyî ronê.  Semedê xebatêka kongreyêk eşkeno bêro destpêkerdene. Ciwanan û cinîyan zî morê xo da Newroze ro.

Erdlerz semedê kurdan û elewîyan açarîya qirkerdişî.  Nika kenê ke dewanê elewîyan û kurdan veng bikerê. Dest nanê domanan ser. Domanî rotî tarîqatan.  Xelêk kêna û cinîyî ameyî remnayene. Aqibetê înan bewlî nîyo.  Wextê winayên de ma qerarê vindarnayîşê çalakîyan girewt ke wa dewlete bi pêro îmkananê xo tewrê xebatanê xelisnayîşî bibo û wayîrê mexdûranê erdlerzî bivejîyo. La artêşa tirke şer nêvindarna û heme artêşa semedê şerî kerd seferber.  Heme teknîkê xo semedê şerî kerd seferber.  Verê artêşa açarna warê şerî. Şerî bi heme şîdetê xo dewam kerd. Artêşe  tewrê xebatanê çalakîyan nêbîye. Polîsî tewrê ci nêbîyî. Hetkarî ameyî astengkerdene. Nê qerarê ma reyna rîyo raşt ê dewleta faşîste vet werte.

Nika Tirkîya kewt prosesêkê zaf muhîmî. Prosesê vîjnayîşî. No proses semedê şarê Kurdîstanî û şaranê Tirkîya zaf muhîm o. Têkoşînê ma îqtîdaro faşîst ardo prosesê rijnayîşî. Eke nika xebatî xurtî bêrê kerdene miheqeq no îqtîdaro faşîst do 14ê gulane de birijîyo. Na çarçewe de ma qerarê vindarnayîşê çalakîyan newe ra girewt dest. Seba ke no vîjnayîş semedê şarê ma û şaranê Tirkîya zaf muhîm o ma qerar girewt ma do qerarê bêçalakîyîye heta vîjnayîşî bidomnê. Ma do badê vîjnayîşî rewşe newe ra bierjnê.

Prosesê vîjnayîşî de do Rojawan, Vakur û Başûr de hêrişî dewam bikerê. Seba ke ma çalakîyî vindarnayî gerek gerîlayî û şarê ma sist mebê.  Vera hêrişan gerek cewabê xurt bêro dayene. Dewleta tirke ya îşxalkere her ca de yena ma ser, hêrişanê giranan kena. Çekanê qedexeyan şuxulnena. Coka gerek gerîla vera hêrişan şerê aktîfî rayra bêro. Ma çalakîyan nêkenê la eke hêriş bibo cewabê ci gerek bêro dayene.Wextê vîjanyîşî de do hêzê do bajaran de çalakîyan mekerê. Ez rayna vana gerek gerîla û şarê ma amade bo. Çunke no îqtîdaro faşîst seba kevîn mekro do hêrişanê xo bizêdîno.

Nê vîjnayîşî de rolê Îtîfaqê Kede û Azadîye zaf muhîm o. Semedê demokratîkbîyayîşê Tirkîya rolê nê îqtîfaqî muhîm o. No îtîfaq çend hêzdar bo, hîra bo, komelê tîrkîya bîgêro mîyanê xo hende sîyaseto demokratîk bêno hêzdar û verê demokrasîyî yeno akerdene. Xora îqtîfaqê Miletî ra demokatîkbîyayîş pawitiş xeflet o. Nê îtîfaqî ra planêko demokratîk,hemlelêka demokratîke û gamêka demokratîk nîna pawitene.Têna serkêşîya HDPyî de Îtîfaqê Kede û Azadîye Tirkîya de eşkeno demokrasî înşa bikero. Dewlete waşt HDPyî bido xapî ro reyanê ci vila bikero û la HDPyî qerar girewt ke bi nameyê Partîya Çep a Hewze bikero vîjnayîşî ke no qeraro raşt bi. Şarê ma do senî ke rey dano HDPyî nika bido Partîya Çep a Hewze. Badê rijnayîşê îqtîdarê faşîstî her çî vilikûvûm nêbeno. Îtîfaqê Mîletî wazeno têna tay çîyan pîne bikero la gerek zîhnîyet bêro bedilnayene.''