Amed de banê MED TUHAD FEDî de bi wesîleya 4ê Nîsane rojbîyayîşê Rayberê Şarê Kurdî Abdullah Ocalanî kombîyayîş ame kerdene. Kombîyayîşo ke hetê KCD, DBP, HDP, TJA û MED TUHAD FEDî ra ame kerdene de eşkerayîya hempare ameye wendene.

Eşkerayîye de  ame vîrvîstene ke Rayberê Şarê Kurdî Abdullah Ocalan 24 serrî yo Îmrali de binê tecrîdê giranî de yo û nê ameyî vatene: ''Tesîrê Birêz Ocalanî yê serê şarê kurdî, şaranê Rojehelatê Mîyanênî û dinya eşkera yo. Mektûbê ci yê Newroza 2013yî hetê mîlyonan ra ame wendene û wayîrvejîyayene. Bado ke Erdoganî masaya muzakereyî rijnaye, Kurdîstan û Tirkîya de prosesê tarî  dest pêkerd ke hema dewam keno.

Şarê kurdî û dostanê ci 8ê Adare û Newroze de tecrîdê serê Birêz Ocalanî şermezar kerd û azadîya ci waşte. Semedê şarê kurdî, şaranê Rojhelatê Mîyanênî û şaranê azadîwazan ê dinya rojbîyayîşê Birêz Ocalanî sembolê haştîye û azadîye yê vera şerî yo. Her serre na roje aktîvîteyê cîya cîya yenê kerdene. Emser ma do bi şîarê 'Semedê Azadîye verbi Amara' rayraşîyayîş bikerê. Ma do pêro pîya verê xo bidê Amara.  Semedê şiknayîşê tecrîdê Îmraliyî û çareserîya demokratîke gerrek her kes tewrê nê rayraşîyayîşî bibo.

Reyna mabênê 1-10ê adare de do leyî bêrê ronayene û her bajarî de şayîye bêro kerdene.''

Hemsereka Pêroyî ya DBPyî Salîha Aydenîz vat: ''Seba ke Birêz Ocalan semedê çareserkerdişê meseleya kurdan û demokratîkkerdişê Tirkîya û Rojhelatê Mîyanênî rolê xo kay bikero, gerek helêke cuwa ver bêro azadkerdene. Rojbîyayîşê Birêz Ocalanî rojbîyayîşê şarê kurdî. Ma pêro pîya 4ê Nîsane de verê xo bidê Amara, ûca azadîye û demokrasîyî newe ra înşa bikerê.''

Hemserê Pêroyî yê KCDyî Berdan Ozturk zî vist vîrî ke kurdî bi serran o çîn hesibîyene û vat: ''Kurdî xo ra şarmîyayênî la xeyrê têkoşînê Birêz Ocalanî û embazanê ci raştîya xo nas kerde. Coka rojbîyayîşê Birêz Ocalanî rojbîyayîşê kurdan o. Birêz Ocalan ewro têna rayberê kurdan nê bi paradîgma û felsefeya xo bîyo rayberê Rojhelatê Mîyanênî. Ma do pêro pîya ver bi Amara şirê û mesajêkê xurtî bidê.''