Mamosteyanê Egitîm Senî 22ê sibata 2016 de çarçeweya Roja Ziwanê Dayîke de mekteban de saetêke dersa ziwanê  dayîke dabî û derheqê înan de cezaya dîsîplînî amebî dayene. Mehkemeya Qanûnê Bigeyênî na ceza sey binpaykerdişê heqan nêdîye.

Qezayanê Licê, Sûr û Yenîşehîrî yê Amedî mamosteyan mekteban de bi qerarê Egitim Senî dersa ziwanê dayîke daye. Dima ra derheqê înan de cipersayîşê dîsîplînî dîya despêkerdene. Cezaya rexnekerdişî dîyayî mamesteyanê ke bi qerarê sendîka çalakîye kerde.

Memosteyan vera ceza îtîraz kerd. Mehkemeya Îdareyî ya Amedî çalakîye sey falîyetê sendîka hesibna û qerarê betalkerdişê dewa girewt. Dewaya hetê rayraberdişî ra kirişîyaye Mehkemeya Îdareyî ya Herême ya Dîlokî. Heyetê mehkeme çalakîye sey falîyetê sendîka nêhesibna û qerarê heqê perwerdeyî ameyo binpaykerdene girewt. Mamosteyan û Egîtm Senî qerar kirişt Mehkemeya Qanûnê Bigeyênî. Muracatan de ame vatene ke heqê înan ê azadîya îfadeyî û organîzkerdişê kombîyayîşî û çalakîye ameyo binpaykerdene.

Mehkemeya Qanûnê Bigeyênî muracatê sendîka sey hetê mexdûrî nêgirewt dest û vat: ''Goreyê qanûnê Komara Tirkîya  ziwanê perwerdeyî tirkî yo û qet yewna ziwan nêeşkeno dezgehanê perwerde û musnayîşî de sey ziwanê dayîke bêro wendene, musnayene. Mehkemeya Qanûnê Bigeyênî cezaya meaş birnayîş û rexnekerdişî ke dîyaya mamosteyan heqdar dîye.