Goreyê xebera Ajansê Mezopotamya domanê kurdî yo bi nameyê Y.D.yî  (14) şewa 21ê adare gama ke pîya bi emazanê xo agêrayêne keye hetê polîsanê tirkan ra ame remnayene.

Polîsan bîlasebeb doman berd erazîya venge û  ci rê îşkence kerd ke wa vajo ''ez tirk a'' û kurdan rê nengan biçîno û Marşê Îstîkalî biwano. Polîsan bi îşkenceyê wehşîyî fek û destê domanî girêdayî û eşt kişta dereyî. Tarîya şewe de dewijêkî doman dî û berd nêweşxane.

Domano ke Neweşxaneyê Dewlete yê Licê de raporê derbî girewt û dima ra sewqê Fakulteya TÎPî ya Unîversîteya Dîcle bi, vat  o hetê çar polîsan ra raştê îşkenceyî ameyo. Y. D.yo  ke raştê îşkenceyê polîsan ame rîsk est o ke yew çimê xo vînî bikero.