DYA de polîsê kiştoxî serbest ê, nawnayîşî dewam kenê

DYA de dima ke polîsêkî verê çimanê rayaumûmîye de camêrdêko afro-amerîkan qetil kerd Minneapolis de nawnayîşê protestoyî dest pêkerd û vizêr heta şanî zî dewam kerd.

Polîsanê DYA Minneapolis de verê çimanê hemwelatîyan de camêrdêko afro-amerîkan ê binameyê George Floyd (46) qetil kerdbi. Serebûtî ra dima zî nawnayîşê protestoyî dest pêkerd û vizêr heta şanî zî dewam kerd.

Mudirê asayîşî yê şaristanê Minneapolisî yê DYA seba aramîye venga şarî da. Çalakîyanê şewa bîne dewam kerd. Çalakîkeran dormeyê qereqolê polîsan ê kiştoxan de marketêk û dikanêke vêşnayî. Polîsan vera çalakîkeran bombaya gaze xebitnaye û pê bendan nêverda ke çalakîkeran xo biresnê qerqolî. Perey şewe zî heman şer qewimîya.

Keyeyê George Floydî waşt ke polîsê ke tewrê nê serebûtî bîyî, sûcê cînayetî ra bêrê hukmkerdene. Waye Bridgette Floyd kanala xeberan NCByî reyde qisey kerd û vat: ''Çunke oyo ke înan kerd cînayet o, înan birayê mi kişt. Ez pê bawer a ke edalet do bêro caardene.'' Bridgette Floyd da zanayene ke wezîfe ra dûrvistiş qîm nêkeno.

Polîsê kiştoxî serbest ê

Çar polîsê ke tewrê serebûtî bîyî, roja sêşemeyî wezîfe ra ameybî dûrvistene labelê dima ameyî veradayene. Derheqê înan de tehqîqatêk dîya destpêkerdene.

Şaredarê Minneapolisî Jacob Freyî persa ke çira kiştoxê Geroge Floydî nênê tepiştene û vat: ''Eke ma çîyêko winasên bikerdêne ma nika zîndan de bîyêne.''

Serekê DYA Donald Trumpî twitter de eşkerayîyêke daye û polîsanê federalan ê FBI û Wezaretê Edaletî ra waşt ke nê serebûtê trajîk û xemgînî eşkera bikerê.