Awankerdoxanê PKKyî ra Sakîne Cansize, temsîlkara KNKyî ya Parîsî Fîdan Dogane û endama têgêrayîşê ciwanîye Leyla Şaylemeze yê ke 9ê Çile ya 2013î de paytextê Faransa Parîs de ameyî qetilkerdene, 12ê Çile de (siba) Parîs de do bi rayraşîyayîşêk û mîtîngêk bêrî vîrardene. Têgêrayîşê Cinîyan ê Kurdan ê Almanya (YJK-E) derheqê çalakîya Parîsî de eşkerayîyêk daye û nê pare kerdî:

‘‘6 serrî yo ke cinîyê Kurdî, şaro Kurd û dostê înan seba eşkerabîyayîşê qirkerdişê Parîsî payra yo. Seba ke raştî vejîyo meydan û sûcdarî ceza bigîrê şaro Kurd tim hîsdar têgêra. Ma zanê qetilkarî kamî. Kerdoxî bewlî yê, çîyo ke ganî bêro kerdene bicaardişê edaletî yo. ‘Operasyonê Sakîne Cansize yê Şorişgêrî’ yê HPGyî de 2 ajananê îstîxbaratê Tirkî amebî tepiştene. Nê ajananê îstîxbaratê Tirkî vato ke qirkerdişê Sakîne Cansize, Fîdan Dogane û Leyla Şaylemeze bi hayîya û tesdîqê serekwezîrê Tirkî yê ê wextî virazîya. Dimayê mergê Omer Guneyî yo bişaîbe ramot ke qirkerdişê Parîsî bi hemkarî û bazarîyanê leyminan ameyo kerdene. Heta Fransa nê qirkerdişî nêkero zelal do no seba dewleta Fransa û îdareyê ci sey şermêk û leymêko sîya bimano.

Qetilkaran ke waşt ke vernîya cinîya azade bigêrî, waştişê înan nêame ca. Ewro Têgêrayîşê Azadîye yê Cinîyan ê Kurdan rayberîya hemraya Sara de aver şino û hetê heme dinya ra yeno naskerdene. Ruhê Sara heme dinya ra vila bîyo û ê ke cigêrayîşê azadîye de yê înan ra beno îlham. Rayber Apo vatbi ke ‘‘şexsê Sara de ez ameya hedefgirewtene‘‘ ewro reyna vera Rayber Apo û têgêrayîşê azadîye konseptê hêrişî dewre de yo. Hemverê nê hêrişan de rayberîya Leyla Guvene de xeta Sarayan de xoverdayişêko gird û birûmet yeno dayene. Semedê Rayber Apo û grevanê vêşanîye rê wayîrvejîyayîş û layiqê şehîdanê xo bîyayîş ma do 12 ê Çile de Parîs de tewrê çalakîya protestoyî bibo û semedê persayîşê hesabî vengê xo berz bikero. Ganî sere de cinî heme şarê Kurdî û dostê ma tewrê na çalakî bîbê.‘‘