Hemsereka KCDyî û Wekîla HDPyî ya Colemêrgî Leyla Guven rê cezaya zîndanî ya 22 serran û 3 mengan dîyaye û Guvene dima ke tepişîyaye erşawîyabî Zîndanê Amedî.

Avûkatanê Leyla Guven da zanayene ke Guvene vizêr Zîndanê Amedî ra sewqê Zîndanê Xarpêtî ameye kerdene û avûkatan rê derheqê sewqî de zanayîş nêdîyayo.

Serekwekîla Gruba HDPyî Merale Daniş Beştaş zî eşkera kerd ke Guvene bi hawayêkê îlegalî sey rehînêke erşawîyaye Zîndanê Xarpêtî û hayîya avûkatan zî pê çinbî.

Kênaya Leyla Guven Sabîha Temîzkan hesabê xo yê medyaya komelkîye ser o pare kerd ke dadîya ci şewe ameya sewqkerdene.