Hemserekê Konseya Rayberdişî ya Îdareyê Xoserî yê Şingalî Merwan Bedelo ke hêrişê vizêrînî yê dewleta tirke ya îşxalkere de amebi qetilkerdene, pê merasîmêkî ame definkerdene.

Cenaza serê sibayî ameye ardene bi keyeyê Bedelî. Dima ke wecîbeyê dînî ameyî caardene cenaza pê sloganê 'Şehîdî nêmirenî' ameye berdene bi goristanê Şehîd Dilgeş û Berxwedanî û ameye definkerdene.

Îdareyo Xoser ê Şingalî, endam û temsîlkarê TAJÊ, Yewîya Ciwanan ê Êzidîyan, Hemserekê PADÊ, Yewîyê Pawitişî yê Şingalî (YBŞ) û Yewîyê Cinîyan ê Şingalî (YJŞ), Asayîşê Êzidxanî, rayberê dînî û komelî û şarê erebî tewrê merasîmê definkerdişî bîyî.

Nameyê YBŞyî ser o Tîrej Şengalî merasîm de qisey kerd û vat: ''No şehadet mojneno ke seba êzidîyan rêxistinîye û pawitişî ra ber sewbîna rayîr çin o.''

Hemserekê Meclîsê Xoserîya Demokratîke yê Şingalî (MXDŞ) Heso Brahîmî vat: ''Embaz Merwan Bedel bîyo fedayîya Melekê Tawisî. Ma do rêçê înan ser de bibê.''

Dayîka bi nameyê Şemê Remo nameyê TAJÊ ser o qisey kerd û vat: ''Mesuldarê nê hêrişî hukmatê Iraqî yo ke dostê Erdoganî yo. Ma hukmatî şermezar kenê.''

Qiseykerdişan ra dima cenaza pê sloganan ameye definkerdene. Şarî definî ra dima dest pê çalakîya rayraşîyayîşî kerde. Şarî çalakîye de fotografê Bedelî kiriştî û sloganî berz kerdî. Cinîyî rayberîya çalakîye kenê.