Garîbe Gezer 9ê kanûne de Zindanê Kandira de bi hawayêkê şikdarî dinyaya xo bedilnaye. Gezere verî raşta tecawuz, îşkence, teda û mualemeyê xirabî amebî.

Merkezê Heqanê Cinîyan ê Baroyê Mêrdînî û Komîsyonê Heqanê Merdiman, Salona Konferansî ya Baroyê Mêrdînî de, platformê Cinîyan ê Şahmaran û şarî reyde derheqê Garîbe Gezer de eşkerayîye daye.

Avûkate Rûşene Bîngul Bînbaş vist vîrî ke wextê otopsî de agahîye nêdîyaye keye û avûkatan û vat: ''Ney zî şikê îşkenceyê vera cenaza zêdîna. Wexto ke cenaza ameye Mêrdîn nêzdîbîyayîşê bi keye û merdiman sûcê cîyakerî û vilakerdişê nefret û dişmenîye yê.''

Bînbaşe da zanayene ke wexto ke cenaza ameyêne berdene bi Kerboran wesayîtê cenaza nêdîya û no zî sûcê cîyakerîye yo. Bînbaşe vat: ''Ma bi saetan Meydanê Teyarayan ê Mêrdînî de pabeyê wesayîtê cenaza yê şaredarîye bîyî, bi nê hwayî keyeyî rê îşkence ame kerdene. Dezgehê umûmîye pê nêdayîşê wesayîtî wezîfeyê xo bi nîyetê xirabî şuxilnayo.''

Bînbaşe vat wexto ke polîsan Kerboran de rayîrê cenaza birna, rayîrê alternatîfî girewtî û Bînbaşe vat: ''Mergê Gezere normal nîyo. Kesê ke bîyê mesuldarê mergê Gezere wa bêrê muhakemekerdene.''