Endamê Komîteya Merkezî ya PKKyî Muzaffer Ayatayî qismê diyînî yê roportajê xo de rewşa hukmatê AKP-MHPyî û dewleta tirke ercnayî.

Qismê diyînî ra tay noqtayê girîngî wina yê:

''Şerê ma 40 serrî yo dewam keno û hînî safhaya fînalî de yo. Xora dewleta tirke heta nika pê pêro îmkananê xo têna vera kurdan şer kerd. Şerê vera gerîlayan zehmet û mesrefîn o. Tirkîya destekê NATO û Amerîka ra nêbîyêne nêeşkayêne hende nê şerî bikera. Serewedaritişê PKKyî zî serewedaritişanê bînan ê kurdan ra cîya bi; hîna hîra û rêxistinkerde yo.

Hulusî Akar bîyo wezîrê cenazayan. O bi rehetî vano '2015 ra nata ma 35 hezar terorîstî bêtesîr kerdî.' 35 hezar merdimî yeno manaya 35 hezar keyeyî. Yanî ti şîn dekenê mîyanê komelî. Dewlete bi nê vateyan şerê psîkolojîkî kena. Xora nê xeberê ke ê danê zûr ê. Dewleta tirke bi nê vateyan mesajê 'Ma binê tehlukeyî de yê, coka hêriş kenê' dana. Dewleta tirke pê nê zûran hêrişê Rojawanî kena. Tirkîya pê xeberanê zûran û kayanê mezgî tim kurdanê Rojawnaî binê teda de tepişena, DAÎŞî weye kena û Rojawan de kaosî virazena. Tirkîya verê xo dayo rijnayîş, binpaykerdiş û vêşnayîşî. Tirkîya têna xirabîye vila kena derûdorê xo rê.

Dewlete Vakurê Kurdîstanî de şar binê teda de tepişena. Vakur de dewlete rewşa îstîsnayîye ana ca. Dewlete şarî de dişmenîye kena û şerê taybetî kena. Eke ti merdiman rê fuhuş, vêşanîye, tîryakî û ajanîye ferz bikera ti înan qetil kenî. Dewlete vera kurdan şerê psîkolojîkî kena û kena ke kurdan têna war verda. A raşte Tirkîya zî bi nê hawayî texrîbatêkê pîlî ciwîyena. Eke ti kurdan rê wina bikera hînî komelê Tirkîya zî nêmaneno, pûç beno. Erdogan her kesî, her çîyî pûç keno.

Mîyanê kurdan de xayînê sey PDKyî est ê. Dewleta tirke Başûrî îşxal kena la PDK ci rê rayîran virazena. PDK tim PKKyî sûcdar kena la verê dewleta tirke de zî fekê xo anêkena. Dewleta tirke pê operasyonê 'Pençe-Kîlît' kilîd nayo fekê Barzanîyî ro. Barzanîyî bêveng ê. PDK pêro Başûrî pêşkêşê dewleta tirke keno. Dewleta tirke nika zî çekan dana tirkmenan ke Rojawan û Başûrî ra dima Kerkûk û Mûsilî îşxal bikera. Xora Erdogan vano 'Kerkûk ê tirkan o.' Ê kurdan uca de nêwazenê. Nika Tirkîya Kerkûk de tirkan ca kena.

Dewleta tirke pêvînayîşanê bi Esadî ra armanc kena ke pê paşdayîşê Esadî herêmanê kurdan bi temamî îşxal bikera. Erdogan şêro kamca îşxal, faşîzmî beno uca. Erdogan pêro dinya rê nika terorîzmî îxrac keno. Xêrê AKP-MHPyî ra Tirkîya bîya merkezê terorîzmî ya dinya. Tirkîya fînansman, çime, têkilîye û resnayîşê terorî peyda kena. Pêro cergê cîhadîstî herêmanê Tirkîya de weye benê. No tercîhê Tirkîya yo. Cergî zereyê Tirkîya de vila bîyê.

Erdogan seba îşxalî Putin (Rûsya) û Îranî de ronişeno. Erdogan têna semedê kurdan vano terorîst la qala El Nûsra nêkeno. Tirkîya sînorê 30 kîlometre yê Sûrîye herêma asayîşî îlan kerda û waşt wa tede kurdî çin bê. Nika Efrîn de têna cergî est ê. Tirkîya nêverdena kurdî abigêrê Efrînî. Cayanê îşxalkerdeyan de kurdî nêeşkenê biciwîyê. Çunke Tirkîya nê cayan de kurdan rê terorî kena. La terorê Tirkîya nêdîyeno. Tirkîya verê çimanê Rûsya, NATO û Îranî de nînan kena û çunke cara peymana înan a nimite est a. Înan pêkerd ke kurdan pîya çin bikerê.''

Do dewam bikero...