Rayberê Şarê Kurdî Abdullah Ocalanî ra dî serrî yo qet xeberêke nîna girewtene. Avukat Cemal Demîrî derheqê babete de ajansê ma rê qisey kerd.

 Avûkat Cemal Demîrî vist vîrî badê Komployê Mîyanneteweyî yê 15ê Sibata 1999î ra nata Abdulla Ocalan vera huqûqê dişmenîye têkoşîn keno û vat: ''Rixmo ke binê tecrîdê giranî de yo zî seba ke bibo vengê şarê xo têkoşîn keno. Gerek ma zî şertanê Îmraliyî yê teberê merdimîye bikirişê rojdemê welat û dinya û wezîfeyê xo bîyarê ca. Kurdîstan û xeylêk welatanê dinya de vera tecrîdê giranî yê serê Birêz Ocalanî hêrso gird est o. No tecrîdo giran açarîya tecrîdê hîra û plankerdeyî. 

Di serrî yo ne Birêz Ocalan û ne tepişteyanê bînan ê Îmraliyî ra qet xeberêke nîna girewtene.  Îqtîdar bi nê tecrîdê qetî zor dano sebrê komelê kurdan.  Çim û goşê her kesî Îmraliyî ra xeberêke paweno. Xora hîsgêrîya komelî ya semedê Birêz Ocalanî yena zanayene. Îqtîdar gerek semedê haştîya komelkî, nê tewirê xo yê tehrîkkarî yo ke huqûqî binpey keno, cade caverdo.''

 Avûkat Cemal Demîrî  wina dewam kerd: ''Şarê kurdî û dostê ci wazenê helêke cuwa ver Birêz Ocalanî ra xebere bîgêrê. Bitaybetî Newroza 2023yî de bi mîlyonan meydanan de no waştişê xo ard ziwan. Ma hêzê sîyasî, polîtîk û komelkî yê Birêz Ocalanî Newroze zaf zelal dî. Gerek nêzdîbîyayîşê Birêz Ocalanî goreyê nê bêro destgirewtene.

Birêz Ocalan Rayberê Şarê Kurdî yo. Wa na raştîye nêro vîrakerdene û goreyê ci bêro têgêrayene. Coka gerek helêke cuwa ver Birêz Ocalanî reyde pêvînayîşê avûkatan û keyeyî bêro kerdene.  Seba ke sîstem û şexsê antîdemokratîkî perspektîfanê çareserî yê Birêz Ocalanî ra tersenê, tecrîd yeno girankerdene. Wedartişê tecrîdê Îmraliyî semedê amayoxê şaranê Rojhelatê Mîyanênî zaf muhîm o.''