Serekwekîlê Grûba HDPyî  Saruhan Oluçî  bale  ate rewşa Çewlîgî ser ke binê rîskê girdî yê erdlerzî de yo û waşt wa bajar sey herêma afate bêro îlankerdene.

Oluçî vistî vîrî 10 bajarê erdlerzê peyênî, sey herêma afate ameye îlankerdene û dima ra Xarpêt zî  tewrê nê bajaran bi û vat: ''Çewlîg merkezê erdlerzî yo. Wird xetê fayî yê vakur û başûrî tîya yenê het. Şarê Çewlîgî qerqilîyeno û wazeno ke bajar bibo herêma afate. La îqtîdar qet gameke nêerzeno. Eke bêro waştene demê kilmî de Çewlîg eşkeno vera erdlerzî bibo bajarêko nimûne. Xora pîsporê erdlerzî tim bale ancenê Çewlîgî ser. Erdlerzanê Çewlîgî yê 1971 û 2003yî de zî mojna ke xetê fayî yê tewr xidarî tîya de yê. Coka gerek semedê Çewlîgî cade tedbîr bêrê girewtene sey herêma afate bêro îlankerdene.''